Economia di Aruba ta mustra un crecemento prospero, mientras cu finansa di gobierno tambe ta mustra un imagen positivo. Segun e Colegio di Supervision Financiero di Aruba (CAft), awo t’e momento pa Aruba tuma e posicion financiero faborabel aki pa realisa mehoracion structural den finansa di gobierno y pa aumenta e resistencia economico.
Un maneho di presupuesto prudente y reforma structural den siguridad social y mercado laboral ta esencial den esaki. E presupuesto di aña 2024 ta cumpli ampliamente cu e norma di presupuesto central, cu un surplus spera di minimo un porciento (1%) di e producto interno bruto (GDP). Pero e gastonan halto di interes, cu actualmente ta casi 1/5 parti di e presupuesto, ta forma un riesgo y por pone gasto of inversion na peliger den futuro. Pago di debe ta crucial segun e CAft.
Colegio di Supervision Financiero di Aruba (CAft) ta positivo tocante e intension pa aumenta e inversionnan pa 115 miyon florin den aña 2028, cu ta pa fortalece economia di forma duradero. Ta subraya e importancia di un agenda di inversion di varios aña cu ta acorda cu e obhetivo di maneho, incluyendo e Landspakket.
Awo cu tin espacio presupuestario, segun CAft, t’e momento ideal pa realisa e reformanan necesario. Den cuido di salubridad ta tuma paso pa control structural di gasto y CAft ta wak un cuadro di gasto como un instrumento positivo di control. Pa siguridad social y mercado laboral, CAft ta conseha reforma cu ta haci nan mas dinamico sin aumenta e carga di gasto.
Riba tereno fiscal, Aruba ya a tuma paso pa fortalece e sistema di belasting, pero e sistema di belasting indirecto ta keda fragmenta y compleho. Un transicion pa un sistema mas simpel, manera un belasting riba balor agrega (BTW), ta recomendabel pa un miho cumplimento.
