Diana Richardson ta bibando practicamente den un fierno. Un nieto, Kevin Banfield (22), kende no ta dun’e descanso, apesar cu el a pidi’e na diferente pa no yega su cas mas.
Den entrevista cu señora Richardson, el a splica cu e no sa kico mas pa haci. “Mi kier mi bida bek, mi kier trankilidad.”
Ta trata di un nieto cu ademas di tin un problema mental, ta adicto tambe. E ta uza e cas di su wela pa haci su cosnan y ni cuanto a core cu ne, e ta keda bolbe. Tristo, segun e wela, e ta sinti’e menasa pa motibo cu e nieto tin armanan blanco. Un biaha cu e wela a haci un denuncia na polis, el a yega su cas y a haya e nieto ta ward’e cu un machete banda di dje. “Mi a sintimi menasa,” el a conta.
E no ta compronde di con autoridadnan no por haci nada, apesar di tur denuncia cu e ta haci. Un biaha el a pidi un ordo di restriccion. Pa seis luna e tabatin trankilidad y e por a biba den su cas. Pero despues, e problema a sigui atrobe. E cas ta totalmente destrui. El a pidi e mayornan pa bin busca tur cos di e yiu for di su cas den Cantaloupestraat.
Diana Richarson a bisa cu no por ta posibel cu e tin cu bay keda cerca un ruman, siendo e tin su mesun cas. Pa e motibo aki e ta pidi autoridadnan haci algo, pasobra e situacion aki ta bayendo asina pa un aña caba. El a cana tur sorto di caminda y no ta mira resultado.