Ta consider’e un di e cancionnan mas gusta pa e aña aki y ta bira e prome hit di e islanan Aruba, Boneiro y Corsou, cu ta dal asina duro. Ta referi aki na e cantidad di biaha cu a mir’e, toc’e of scuch’e via e plataforma social YouTube. Te cu awe, e cancion aki a alcansa no menos di 1.117.850 views. Claro cu awendia no ta solamente e produccion musical ta conta, sino tambe e videoclip cu ta bin cu ne, cu den e caso aki tabata dirigi pa Selwyn de Wind.
A lansa e cancion, hunto cu e videoclip dia 21 di december 2022 y awo, apenas 9 luna despues, ata e cancion a surpasa 1 miyon views. E ta un di e cancionnan mas gusta pa bay cu e titulo di cancion di aña, aunke cu nos falta dos luna mas pa e aña aki caba.
Tocante “Nijmegen”
E cancion aki, Nijmegen, a nace danki na composicion di Jeon mes, mientras cu e areglo tabata den man di Jespy. Den e cancion aki, Jeon a invita su amigo di Cosou, Ori, pa canta cu ne. Jeon mes a sigura cu e gusta haci muziek cu Ori. Nan tin varios hit caba hunto, manera “Den Haag”, “Nijmegen” y sin lubida “Nad’i Lovey Dovey”. Den e videoclip tin dos modelo ta sali tambe, esta Denise Hudgson y Jemerlee de Meza.
E cancion mes ta masha den demanda, pasobra e videoclip di Jeon mes a surpasa 1.1 miyon pero e mesun cancion aki, canta pa Icons, tambe ta na 689 mil views, pues bastante pidi. Di otro banda, e mesun Icons cu e cancion “Una escapadita” unda Jeon ta sali cu su casa Karol Croes, tambe ta na 951 mil views, pues no ta falta mucho pa e hit 1 miyon views. Di otro banda, e cancion di shete aña pasa, “Pakico” di Jeon hunto cu Freddy & Awaras tin un cantidad di 2.1 miyon views.
No ta e prome hit
Mester menciona cu esaki no ta e prome hit di Jeon pa surpasa 1 miyon views riba Youtube. Ta bon pa menciona cu aña pasa, dia 11 di juni 2022, el a lansa e hit “Savaneta” cu entretanto tin 1.015.823 views. Pero, esey a cay den aña 2022, mientras cu Nijmegen a yega e cantidad di views den e aña aki. Obviamente, e hit di mas grandi te awo di Jeon ta e cancion “Machika” cu ta conta cu no menos di 207 miyon views. Esey ta e cancion cu Jeon ta sali hunto cu Anitta y J. Balvin. A lansa e cancion ey dia 19 di januari 2018.
Tocante Jeon
Jonathan Bryan Thiel, conoci artisticamente como “Jeon Arvani”, ta naci na Aruba dia 27 di januari 1991, pues tin apenas 32 aña di edad. El a produci riba 500 cancion durante su carera musical, cu ta inclui albumnan manera Biggy Boy Forever, Santa Cruz y Otra Noche.
Na aña 2018 el a graba e hit “Machika” cu J Balvin y Anitta. Hunto a logra un “Platinum Album” mientras cu a stream e cancion mas di 100 miyon biaha riba Spotify den mas di 60 pais rond mundo.
E ta conta cu nominacionnan pa “Latin Grammy Award for Record of the Year” y “Lo Nuestro Award for Urban Collaboration of the Year” cu e cancion “X” di Nicky Jam y J Balvin na aña 2018. El a yega di presenta cu concierto di Chris Brown, Don Omar, J Balvin, Romeo Santos, Juan Luis Guerra, Gente de Zona, Zion & Lennox y hopi mas.
Localmente el a lansa megahitnan manera “Dushi bida” y “Ta mi hendenan”. Na aña 2016 el a gana e premio di artista, cancion y video di aña, pa e cancion “Dushi Bida”. Na 2017 Tourism Corporation Bonaire a reconoc’e cu e medaya di oro como embahador. Na 2018 a reconoc’e como embahador di Corsou.
Jeon awendia ta trahando duro pa su comeback internacional, despues di contratiempo den pandemia, perdida inespera di su ruman muhe y retonan cu su mesun salud. Den e siguiente lunanan lo tende hopi mas di dje, na Merca, Europa, pero tambe den Latino America na unda e ta trahando riba diferente proyecto simultaneamente.
Letra di Nijmegen
E tempo a pasa bay. Awo nos tur dos ta madura. Mi ta sinti nos a hiba e cos muchu pura. Ki a pasa, nos a laga curason na treinstation. Mi kier pa bo sa cu mi tampoco un keda bon. Y mi sa riba caya Bo ta tene mi cancion. Ma hera laga tur cos cay pa bini cerca bo.
Miho mi keda Nijmegen. Keda pa semper. Keda paso mi lo kier pasa december. Miho mi keda Nijmegen. Keda pa semper. Ami cu bo. Ata un otro december.
Nada un ta pasa pornada. Ay e coy bo tin cu sa. Wak bo curason mester ta na luga, luga, luga. Tuma esey. Mi no mester a cay. Ta miho mi a keda cerca bo. Ma cana cay bira ciego sin por mira bon. Mi mester a paga tino. Na ki biggy a bisa mi. El a bisa mi cu e n’ ta mira e co’. Mi no sa ni con pa para warda nada. Paso mi ta.
Miho mi keda Nijmegen. Keda pa semper. Keda paso mi lo kier pasa december. Miho mi keda Nijmegen. Keda pa semper. Ami cu bo. Ata un otro december.
Pafo, ta friu. Mi kier tin bo. Ki nan net band’i mi. Mane t’un extra jas. Cumpli bo fantasy. Hiba bo te Paris. Den e universo bo te miss. Pero mi no a keda pa bo haci mi feliz.
Awor cu mi ta sin bo. Con bo kier pa mi brasa bo. Con bo kier pa mi sunchi bo. Con bo kier pa mi cuida bo, si awenochi bo no tey. No lo tin anochi. No lo tin mainta. Lo e luznan di Nijmegen, no tin niun color den nan mas si mi ta cu bo. Daisy mi ta cu bo. Si mi ta cu bo.
Lo mi keda Nijmegen. Keda pa semper. Keda paso mi lo kier pasa december. Miho mi keda Nijmegen. Keda pa semper. Ami cu bo. Ata un otro december.
