President Nicolas Maduro a anuncia di a termina e relacion diplomatico entre Venezuela y Merca.
Den un acto dilanti simpatisantenan e mandatario a duna 72 ora na e funcionarionan diplomatico Mericano pa bandona e pais. “Mi a dicidi di kibra e relacionnan diplomatico y politico cu e gobierno imperialista di Merca”, Maduro a bisa desde e cede presidencial. Miles di opositor a marcha exigiendo pa Maduro stop e usurpacion di poder.
E la haci esaki despues cu Merca a tuma e decision di reconoce lider di opocision como president interino. Juan Guaido, lider di e asamblea general cu ta controla pa e oposicion, a declara su mes presidente interino y a bisa di bay eleccion. E administracion di Trump a sostene esaki, cual a bisa di ta di acuerdo pa uza tur poder economico y diplomatico pa trece bek e democracia Venezolano.
Den su discurso Presidente Maduro a bisa cu Merca tabata haciendo un eror grave door di purba impone un president na Venezuela y bisa un lista largo di paisnan –Guatemala, Brazil, Chile y Argentina- cu a mira gobierno deriba links of someti na un gobierno militar durante Guera Friu cu e sosten di Merca.
