Aruba ta ful den gara di e ambiente di fin di aña, unda cu varios cas ya caba a cuminsa dorna pa asina trece un tiki di e dushi temporada aki den cada hogar.
Pa algun aña caba ta tradicion cu ta dorna e rotondenan di Aruba den e ambiente di Pasco y algun famia ta cera cabes hunto pa asina cubri e gastonan cu esaki ta trece cu ne. Un di e rotondenan masha conoci mes, t’e Rotonde di Mama Rosa na Piedra Plat. Pa dos aña consecutivo esaki no tabata posibel, tanto door di e situacion financiero pero tambe door di e pandemia di Covid-19.
Pero e aña aki si no a perde pa gana y un biaha mas, a trece e dushi ambiente di Pasco den bario di Piedra Plat. Rosa Croes, miho conoci como Mama Rosa a conta cu tempo cu el a bin biba eynan, e tabata mas mondi. Y poco poco a cuminsa dorna, hacie mas grandi. Y e tabata algo cu tabata trece alegria.
INSPIRACION
E inspiracion pa Mama Rosa ta bin di su yiunan cu ta esunnan cu ta pensa ki tema nan ta bin cu ne cada aña. Ta mas di 25 aña caba nan tin e ta dorna e asina yama ‘rotonde’. Na comienso e tabata un parke di Mama Rosa. Y e aña aki e ta mas grandi cu e añanan anterior, ya cu pa dos aña no por a hacie manera cu mester ta, door di COVID.
Croes a bisa cu e ta haya falta di e gaitanan, manera antes cu tabata tin Originales of Banda La Paranda. Antes nan tabata toca den un cas, di manera simpel. Diasabra a habrie cu tocamento y lo purba pa den e siguiente simannan si por haya un gaita pa toca. Tur placa cu nan recauda ta pa nan por cumpra material nobo y tambe pa e gasto cu e rotonde di luz ta trece cu ne.
Pero sigur, nan ta hacie cu hopi amor.
ROTONDE DI MAMA ROSA
E rotonde ta situa na Piedra Plat. N’e luga di drecha taira, su dilanti, na man drechi, bay noord eynan. Si ta bin di abou, yega na e luga di drecha taira, bay stret noord.
