Ministerio di Enseñansa, Ciencia, Cultura y Deporte (ESKD) a celebra Dia prome di december 2022: Dia di Enseñansa grandemente hunto cu un publico di mas cu 250 participante.
Durante di e actividad Minister di Enseñansa Sithree van Heydoorn den presencia di Gabinete Pisas a presenta su vision pa mehoracion pa enseñansa. Tambe Minister a presenta e siguiente informacion:
Ki ta tur e mehoracion nan y con ta sigui cu e mehoracion nan. Secretario-General Susan Larmonie-van Heydoorn hunto cu Director di Enseñansa y Ciencia Wladimir Kleinmoedig tambe a combersa y delibera riba e operacion di mehoracion pa enseñansa.
Tur stakeholder manera Sindicato, Directiva di Scolnan, Scolnan di Fundeshi, Scolnan Secundario, Fundacionnan di enseñansa, Universidadnan, Comision di mayornan, y varios organisacion mas cu ta traha hunto cu enseñansa a keda invita.
Nan por a manda 1 of 2 persona pa participa na e actividad aki na Marriot Beach Resort. E celebracion a cuminsa cu un antesala caminda varios persona a combersa cu colaborado di ministerio Jakeema Hernandes y alabes desea henter e veld di enseñansa pabien.
E programacion oficial a keda guia pa moderado Scarlet Zalm, e alumnonan di Colegio Don Sarto a canta himno y presenta dos bunita cancion bou di guia di Anne Alse. Henter e programacion a keda transmiti ‘live’ via di rednan social di Minister y Ministerio di Enseñansa, Ciencia, Cultura y Deporte. Mayoria di e informacion a keda presenta di forma di produccion di video cu tambe ta keda publica den e dianan cu ta sigui.
Minister su vision pa mehoracion di enseñansa ta: “Enseñansa mester forma e mucha di un manera holistico pa e bira e hende cu pleno capacidad y potencial, cu e identidad colectivo pa participa di un forma autonomo, responsabel, constructivo y contribui asina na desaroyo economico, social, cultural y spiritual di nos sociedad”.
Esaki ta base pa formacion di e ciudadano di forma holistico pa e por contribui na desaroyo di nos nacion pa asina tur ciudadano por progresa y contribui na adelanto di nos pais di forma moderno. Dos factor importante pa e vision ta: e mucha/studiante y e docente/maestro. Ta nan dos hunto ta hiba na exito den enseñansa.
Exito y realisacion di e vision ta tuma luga na final den e scol, den e klas, den e interaccion di tur dia entre e maestro i alumnonan. E maestro di scol ta instrumental pa nos brinda nos muchanan un educacion mas completo, holistico y optimal. Ta e maestro di scol mester aplica y crea sinergia den tur e areanan y aspectonan di enseñansa pa por garantisa cu nos muchanan ta haya un educacion na nivel y di calidad.
Na final di e reflexion minister di ESKD Sithree van Heydoorn a haci entrega oficial di recomendacion concreto pa cu enseñansa. E documentonan cu a keda entrega ta:
1. Ordenansa Promocion personal pa enseñansa, (Landsbesluit Bevordering Onderwijzend Personeel);
2. Proposicion nota di maneho dianan di vacacion pa personal no-docente (Beleidsnotitie Vakantiedagen niet onderwijzend personeel);
3. Ordenansa ministerial pa regla sistema di “normjaartaak” pa personal di enseñansa (Ministeriële beschikking regeling van de normjaartaak systeem onderwijzend personeel).
Minister a haci peticion na Sector di Enseñansa pa trata e documentonan aki y pidi pa esaki nan por bira realidad pa e aña escolar 2023/2024.
Ministerio di ESKD ta mira bek riba un actividad exitoso y ta sumamente contento cu tur a personanan cu a participa.
Danki na cada un di e alumno- y docentenan di Scol di Fundeshi St. Fransiscus College y Gouv. Lauffer VSBO, Directiva di scol, e representantenan di sindicato cu a participa na e produccionnan.
