A pesar cu organisador di e evento ‘Ballers & Babe’ a traha na un forma organisa pa pidi tur permiso for di dia 9 di mei 2022, KPA a dicidi pa no honra e peticion pa e permiso. E evento aki tabata tin como atraccion principal e rapper ‘Rich Kalash’.
Esaki sigur a bini como un sorpresa mirando cu ta apenas 24 ora prome cu e evento mester tuma luga, cu a anuncia esaki na e organisadornan. Esaki sigur ta algo di lamenta mirando cu tur preparacion y miles di florin den gasto a tuma luga caba. Si KPA tabatin un problema cu e evento, lo tabata responsabel pa comunica cu e organisadornan algun siman atras pa no mester a haci e cantidad grandi gasto aki.
Mester menciona cu e evento aki tabata uno ‘sold-out’ es decir un cantidad grandi di fanatico tampoco no lo por mira e artista ‘Rich Kalash’ presenta. E organisadornan a duna di conoce cu esunnan cu a cumpra nan carchi via pay.aw lo ricibi nan placa bek otro siman. Pa e otro localidadnan di benta, por pasa na The Venue ( Westraat 1) diamars awo entre 3:00 pm cu 6:00 pm.
Ta di spera cu e departamento di permiso di polis por traha mas organisa y comunica nan decision riba permiso mas adelanta pa por mantene un bon samenwerking.
