En conexion cu un investigacion andando awe mainta Jeugd en Zeden Politie (JZP) a detene e homber di inicialnan: W.A.G.M.G. naci na Aruba di 52 aña di edad. Un investigacion cu a inicia na aña 2019 caminda cu e yiu muhe e tempo ey ainda no tabatin e edad di 16 aña.
For di e keho cu e yiu muhe mes a entrega contra su tata, mester a haci un investigacion riguroso y extenso.
Despues di haya tur e informacion necesario, Ministerio Publico (OM) a haya cu tin suficiente base pa duna JZP e ordo pa detene dicho sospechoso aki.
Prome biaha cu a detene Gario tabata dia 13 di juli 2019. Dos dia mas laat, Hues Comisario a prolonga e detencion cu ocho dia y dia 18 di juli el a keda den libertad.
E tabata representa e tempo ey pa abogadonan di bufete de Sousa, kendenan a duna di conoce cu Gario ta nenga tur acusacion haci den su contra, pero no kier a entrega denuncia di keho falso contra e hoben.
Pa Cuerpo Policial por resolve y investiga mas caso asina aki cooperacion y informacion di pueblo di Aruba ta hopi importante, p’esey ta pidi si bo tin cualkier informacion yama nan tiplijn di Polis cu ta: 11141. Anonimidad ta garantisa.
Antoni Gario ta un musico prominente di nos isla cu ta bin for di San Nicolas. E ta lider di e banda musical Le Groove y ta dirigi tambe un grupo di Carnaval yama Pink 4 Life. Un di su ultimo triunfonan tabata como Soca Monarch na februari 2020.
E interogacion di Antoni Gario a bay largo. Te despues di 9:00 pm a sali cu ne for di warda di polis na Playa, caminda e recherchenan di JZP a interog’e, pa djey transport’e pa warda di polis na Shaba. Na su salida el a declara cu: “Totalmente inocente boys.”
