Te cu diamars, e video mas mira riba 24ora.com tabata e entrevista cu nos colega Nelson “Speed” Andrade a haci cu e señora mama di e hoben special cu a fayece di Coronavirus na Madiki dia 15 di april ultimo. Mas di 133 mil usuario a mir’e. Pero, ayera e noticia di e detencion di Richi Danies dialuna ultimo riba Plasa Henny Eman a kibra e record, surpasando 134 mil views. Nos colega Brian Koolman a graba y a entrevista Richi memey pleno accion, hasta ora Polis a deten’e y a purba move 24ora.com mas atras. Brian a score pa e forma trankil con el a sigui graba y a keda pidi e Polisnan pa “na mi un chens di graba”.
El a ripiti e peticion ey na varios ocasion, mientras usuarionan por a mira con Polisnan a manda Danies suela, a bira su mannan pa boei’e y deten’e bou acusacion di a stroba trabou di Polis y di a insulta e defensornan di ley. E acusacionnan no por tabata mucho serio pasobra den menos di 2 ora Danies a recobra su libertad. Pero, e video si a keda “hot” riba rednan social y a crece den cantidad di usuario cu a mir’e, hasta mas di un biaha.
Nos departamento di mercadeo no a keda cu man crusa y asina a nota cu e video ey ta “trending”, a premira mesora cu e lo kibra nos mesun record e aña aki. Ayera tardi el a surpasa e record cu tabata riba nomber di Nelson Andrade. Pero pa momento cu esey a sosode, ya caba e T-shirtnan tabata cla imprimi cu e hastag #namiunchensdigraba como homenahe pa e bon trabou desplega pa nos colega Brian Koolman, un hoben prometedo den e ramo aki.
E ta por lo menos un di e talentonan hoben cu tur dia ta siñando, progresando, desaroyando y ganando e confiansa di nos usuarionan cu ta pendiente di su reportahenan, sea bibo of graba. Brian Koolman ayera tardi a kibra un record den cantidad di views riba e video mas mira pa e aña aki ainda. Cu e cobertura aki, el a surpasa e record cu tabata ainda riba nomber di nos colega Nelson “Speed” Andrade, considera un veterano caba memey di e generacion hoben den prensa.
“E idea ta pa nos pasa nos experiencia y conocemento pa e hobennan y ata…nan ta bayendo bon”, asina Nelson “Speed” Andrade a bisa durante un ceremonia cortico na e oficina di Headlines Group, e cas editorial di 24ora.com. E ta corda con su generacion a siña di Stanley Arends, Richard Lacle, Pedro “Famous” Diaz, Toko Winklaar, Leo Vrolijk, Django Simoons y Jossy Mansur. E miho periodistanan na Aruba mayoria a siña “na pia di trabou” for di esunnan cu mas experiencia y conocemento riba e materia.
Na Headlines Group awendia ta dedica hopi atencion, tempo y recursonan financiero pa sigui educa nos mes den avancenan tecnologico y formulanan nobo pa presenta noticia. Den esey ta conta cu talentonan hoben manera Marko Espinoza, Theodoor de Jongh, Everlis Tromp, Carlos Yedallah, Joshua Bryson, Brian Koolman y Jorgy Mateo. Tur ta siguiendo e universidad nobo den prensa na Aruba, tanto na nivel di skirbimento, presentacion, sacamento di potret, grabacion y edicion di video. Tur cu e meta pa presenta un miho producto na nos usuarionan.
Contrario na medianan convencional, nan nunca lo sa cuanto hende di berdad a lesa un corant of a scucha radio of a mira nan na television. Pero den e mundo moderno na unda websitenan di noticia ta domina, por mira precisamente ken a lesa bo noticia, su edad, su genero, di unda e ta biba, con largo el a keda riba bo noticia, si el a gust’e (like), si el a compartie (share) y si el a comenta riba dje tambe. Y mas un usuario tuma accion riba cada noticia, mas e “engagement” ta aumenta.
Pa e aña aki, e video miho mira como tal ta esun di Brian Koolman, ora a detene Richi Danies e siman aki. E tabata presente na e luga exacto y n e momento corecto, pa por capta delaster un movecion di ambos partido. Ya caba mas di 140 mil usuario a mira e video pa por lo menos 3 seconde. E noticia cu usuarionan a mira mas largo pa e aña aki, ta e candela na cas di ex-Minister Otmar Oduber, di dia 13 di mei ultimo. Usuarionan a mira casi 385 mil minuut di e video aki. E cobertura ey tambe tabata di Brian Koolman, despues cu e ex-Minister y su socio amigo a agredi nos colega Nelson Andrade, pa cual a encarcela Ralph Maduro. E video cu mas engagement, pues cu mas comentario, mas like y shares, ta esun di e pashent contagia cu Coronavirus cu ambulance a hiba Hospital y despues a lag’e benta riba caya atras sin transporte bek pa cas, esey a sosode dia 5 di april ultimo. Tabatin 9,500 accion riba e video cu a hacie e video cu mas “engagement” te na e momento aki. E entrevista ey tambe ta di Brian Koolman.
Cu tur e logronan te na e momento aki, den cual usuarionan ta mira e noticianan ey cu mas frecuencia, ta duna mas comentario, ta gusta nan mas y ta comparti nan mas riba red social, a tene un evento special pa e logro aki no pasa sin mas. Pabien Brian Koolman y sigui cu e bon trabou. Talentonan nobo cu tur dia ta traha practicamente 24 ora pa dia, pa por garantisa cu nos ta keda e website mas grandi, mas mira y e “prome den noticia”.
Website cu mas ta crece na Aruba
Di acuerdo cu estadisticanan estableci, den e prome 6 lunanan di aña, entre 1 di januari pa 30 di juni 2020, e website 24ora.com a conta cu no menos di 1.171.127 usuarionan unico. Esey riba su mes ta representa un crecemento impresionante di mas cu 41% compara cu e prome 6 lunanan di aña pasa. Mester admiti cu desde e crisis di Coronavirus, nos website a crece mas, videonan ta miho mira, usuarionan ta subi mas biaha pa dia y ta keda mas largo tambe riba e site.
Con a bay aña pasa
Aña pasa e video mas mira riba Facebook di 24ora.com tabata un noticia di detencion despues di Jouvert Morning, riba dia 24 di februari 2019. No menos di 339 mil hende a mir’e! E di dos video miho mira, pero cu mas minuut mira den henter e aña tabata e entrevista exclusivo cu a tene cu e mama di e mucha muhe cu nan a viola, di cual e tata a asesina e violado cu un machete. E entrevista haci dia 1 di juni 2019 a wordo mira dor di mas cu 86 mil usuario, cu a mira no menos di 348 mil minuut di e mesun video.
Pa loke ta e website mes, aña pasa a conta cu 1.607.125 usuario durante henter aña, cu ta un crecemento di 13.61% compara cu aña 2018. Ta interesante pa menciona cu e “pageviews” tambe a crece enormemente te na 43.738.239 durante henter aña. E tempo cu cada usuario ta keda riba nos site tambe ta aumentando gradualmente.
Tocante Headlines Group
Mark Benson Denz a funda e prome website di noticia na Aruba, 24ora.com (Prome den Noticia) dia 28 di maart 2007. Awendia e ta e medio di comunicacion mas grandi na Aruba. Diariamente mas di 45 mil diferente usuario ta subi online, mas di 4 biaha y ta keda pa 3 minuut cada biaha riba e website. Riba Facebook nos ta e pagina mas gusta (95K likes) di henter Aruba, cu mas siguido (111K followers) y tambe cu mas “engagement”, surpasando 1 miyon pa siman!