Di dia 9 pa 16 juli 2021 a tuma lugar e campeonato Junior Pan American Weightlifting Championships na e ciudad di Manizales, na Colombia. E evento aki ta clasificatorio pa e Weganan Panamericano Juvenil cu lo tuma luga e aña aki na Cali, Colombia. Pa Aruba a biaha e atleta Jeremy Dijkhoff. E ta hisa peso den categoria di 96kg y como entrenado Walter Llerena.
Esaki ta bira e prome competencia internacional di e atleta Jeremy pa e aña aki. Jeremy cu a sigui cu su trainingnan durante di e pandemia a bay bon prepara. Den categoria di Jeremy tabatin 13 atleta fuerte di e continente Panamericano den e competencia. Jeremy a logra den su hisadanan den snatch di hisa 110kg, clean & jerk 135kg pa un total di 245kg. Cu e total aki Jeremy a kibra su propio record di Aruba cu un progreso di 35kg total den categoria di juvenil Sub-17.
Cu e resultado aki Jeremy a termina na di 12 luga. Ganado den e categoria di 96kg, e medaya di oro a bay pa Colombia, mientras cu e medaya di plata pa Ecuador y brons a bay pa Mexico.
Aruba Amateur Weightlifting Association ta gradici Comite Olimpico Arubano y Setar NV, cu a cubri e gastonan di participacion na Junior Pan American Weightlifting Championships na Manizales, Colombia.
