Corte den Prome Instancia den un decision tuma recientemente a haya un musico culpabel di a abusa di su yiu di criansa menor di edad.
Corte no a tene consideracion cu e acusado John Odwal Tromp, naci na Colombia di 51 aña di edad, pa motibo cu el a abusa sexualmente di dos yiu di criansa di dje.
Hues a dicidi cu un di e acusacionnan presenta pa Ministerio Publico, no ta admisibel pa motibo cu a pasa mucho tempo prome cu a haci denuncia of pa bay over na persigui e acusado. E otro acusacion di abuso sexual contra di e otro yiu di criansa, John Tromp tin cu carga e consecuencia di su actonan.
E victima tambe a atende e caso mescos cu famia di e acusado tambe a duna acto di presencia y por a mira cu e hoben tabata hopi afecta ainda pa loke a sosode cu ne y cu su ruman.
Argumento presenta pa abogado di e acusado, tabata pa mustra cu mama di e mucha no a haya ningun señal di maltrato of algo otro riba curpa di e yiu. Esaki sinembargo no ta indicacion cu e no a wordo golpia ya cu tin partinan di curpa cu e marcanan aki ta disparce rapidamente y no ta visibel mas.
Tambe a trece padilanti cu den combersacion cu maestronan di e victimanan, nan tampoco a mira un of otro actuacion straño of cierto indicacion cu algo lo a tuma luga. Esey tampoco ta nifica cu no a abusa di e muchanan.
Sinembargo ta mustra cu declaracion di e dos rumannan, di cual un di nan lo no ricibi husticia pa loke a sosode cu su persona, tabata hopi concreto y realistico pa cual motibo fiscal a exigi durante tratamento di e caso aki, un castigo di 5 aña y 6 luna di prizon.
Hues a bay di acuerdo cu e peticion aki loke ta pone cu e acusado Tromp lo tin cu sinta sigur tres aña y 8 luna den prizon pa e delito aki cu el a comete cu muchanan cu su responsabilidad tabata di cuida y proteha.
