Child Helpline International ta un organisacion di impacto colectivo cu 155 organisacion como miembro, cu ta duna ayudo telefonico y di internet na mucha y hoben den 133 pais y teritorio rond mundo.
Child Helpline International ta coordina informacion, punto di bista, conocemento y dato di su miembro- y partnernan. E recurso excepcional aki ta uza pa sostene e sistemanan di proteccion di mucha y hoben mundialmente, regional y nacional. Tambe e ta ser uza pa sostene e miembronan di Child Helpline International den nan trabao di fortifica derecho di mucha y amplia e bos di mucha y hoben.
Desde aña 2004 Telefon pa Hubentud 131 ta miembro di Child Helpline International. Pa mas di un ocasion Telefon pa Hubentud 131 tabata representante di Child Helpline International pa e region di Caribe y Latino America. Tambe como miembro prominente Telefon pa Hubentud 131 a yuda e otro paisnan den Caribe y Latino America pa establece nan liña di ayudo telefonico y di internet na mucha y hoben. Tambe na diferente ocasion e personal di Telefon pa Hubentud 131 a duna diferente training na personal di otro liña di ayudo telefonico y di internet den Caribe, Latino America, Qatar y Sur Africa.
Un di e tareanan di Child Helpline International ta monitor e calidad di servicio y e ‘Child Safeguarding Policy’ cu su miembronan ta implementa na nan pais. E mucha y hoben buscando ayudo cerca un liña di ayudo telefonico y di internet, no mag di hay’e cu mas problema door di e ayudo ricibi y mester ser trata den tur siguridad. E mucha/hobennan su siguridad ta na prome luga y e ayudo ricibi no mag di ocasiona mas problema pa e mucha.
Despues di un evaluacion basa ariba ‘Child Helpline International’s Core Quality Standards’ cu a start na comienso di aña 2023, Telefon pa Hubentud a ricibi e noticia cu 131 a pasa e evaluacion exitosamente.
Telefon pa Hubentud 131 ta sumamente contento di a pasa e evaluacion aki exitosamente. Pa Telefon pa Hubentud 131 e calidad di servicio cu ta ser duna na e mucha- y hobennan, y e siguridad cu ta ser brinda na e mucha y hoben na momento cu e ta den contacto cu un di e servicionan di Telefon pa Hubentud 131 ta sumamente importante.
Pa por a yega na e resultado positivo aki, Telefon pa Hubentud 131 ta duna e mentornan diferente training henter aña, ta evalua e impacto di su servicionan y ta incorpora diferente instrumento den su maneho pa salvaguardia e siguridad di e mucha/ hoben cu ta den contacto cu un di e servicionan di Telefon pa Hubentud 131.
Telefon pa Hubentud 131 kier a gradici su partnernan cu ta tuma nan impacto social hopi serio y ta inverti den e mucha- y hobennan di Aruba y Telefon pa Hubentud 131.
Pa mas informacion tocante certificacion di Telefon pa Hubentud 131 basa ariba ‘Child Helpline International’s Core Quality Standards’ por tuma contacto via nos website: 131.aw, Instagram: Instagram: 131aruba, Facebook: https://www.facebook.com/aruba.131, e-mail: [email protected] of telefon 5886138/ 5884011.
