E tabata un lucha largo y no facil. Ruben Garcia, cu dialuna ultimo a cumpli 70 aña di edad y a celebr’e den hospital, tin algun aña ta lucha cu retonan di salud. E tabatin problema cu pulmon y consecuentemente cu su curason. El a cambia henter su forma di biba pa e por cumpra mas aña di bida. Pero e retonan cu pulmon a keda molestie te cu den fin di siman el a empeora y mester a intern’e. Pa falta di oxigeno, mester a pone riba mashin y di eynan su salud a cuminsa bay atras drasticamente. Un rato pasa a drenta e noticia tristo cu el a fayece den cuido intensivo di Dr. Horacio E. Oduber Hospital.
Ruben “Scorpio” (70) Garcia a inicia su carera radial dia 1 di juni 1970 na Radio Kelkboom, despues Voz di Aruba AM na 1976 y sigui pa Canal 90FM na 1989. El a muda pa Magic FM na aña 2002 y finalmente a bira Gerente General di Power FM. Ey e tin su programa radial ainda mainta y su programa asina popular riba diadomingo. Desde aña 1982 e tabata promotor y ya pa hopi aña caba a stop pa dedica unicamente na radio y television. E show di mas grandi cu el a yega di organisa tabata e concierto di UB40 den Aruba Entertainment Center na September 1994. Ruben Garcia ta casa cu Theresa y ta tata di dos yiu muhe y tin 2 nieto.
