Marguerita Wever, Hefe seccion Educativo di Museo Arqueologico Aruba, a expresa di ta hopi contento cu e Caribbean Fari cu a tuma luga diabierna, 26 di juli.
Tabatin hopi mucha y hoben cu a bini pa cera conoci cu e historia di Caribe, sea por medio di expo of tayernan. Loke cu tabata hopi interesante ta cu hopi mucha y hoben a participa den e tayernan duna. E Caribbean Fair a bay den combinacion cu e expo Caribbean Ties. Esaki tabata e prome actividad organisa den un esfera totalmente Caribense, cu musica, cuminda y folklore. Fundacion Lanta Papiamento a haci hopi wega cu e muchanan presente, promoviendo e uzo di Papiamento. Jersey Sophia a canta para riba e balcon di e museo.
Tabata reina un ambiente hopi agradabel, unda cu e publico tabata keda yega te oranan laat di anochi. Museo tin pensa di organisa otro actividadnan pa publico. Na october tin un Cafe Cultural, cu ta forma parti di e expo Caribbean Ties. Na september ta preparando algo hunto cu Monumentenzorg. Ya caba tabatin presentacion di e buki nobo di Arqueologia.
Museo ta moviendo cu su actividadnan y e hendenan a disfruta di Aruba su cultura, su raiznan, cu Aruba ta parti di Caribe y tin hopi similaridad cu otro. “Esey nos a celebra awe tambe,” Wever a bisa.
