Dia 3 di aprel Parlamento di Kòrsou a emití un relato di e preguntanan hasí pa miembronan di Parlamento den un Komishon Sentral, den kuadro di e lei pa regulá e trabou di Deurwaarders. Dia 20 di yüli 2019, Frakshon di Partido Alternativa Real a entregá na parlamento di Kòrsou, e kontestanan riba e preguntanan hasí.
Ku esaki e tratamentu di e lei pa yega na reglanan pa regulá e trabounan di Deurwaarder por kontinuá. E lei aki ta sumamente importante pa protekshon di tur persona ku ta haña nan mes den un situashon kaminda nan tin ku atendé ku un deurwaarder. Minister di OWCS sra. Alcala Wallé, 18 di yüli último, a sinti ku eks – studiantenan ku tin un debe di estudio. Durante e reunion aki, kaminda frakshon di PAR tambe tabata presente, a bin dilanti kon importante e proyekto di lei pa regulá e trabounan di deurwaarder aki ta. For di aña 2010 Kòrsou no tin un kuadro hurídiko pa e tareanan di Deurwaarders ku tur e konsekuensianan ku esaki ta trese kuné. Ku e proyekto di lei aki Frakshon di PAR ta trese kambio den e omishon aki.
