Koningin Wilhelmina Fonds Aruba ta lansa su campaña di concientisacion riba e efectonan di humamento.
Riba Dia Mundial di No Tabaco ta e momento ideal pa enfoca riba e topico aki. E aña aki e tema di e dia mundial ta ‘Tabaco y enfermedadnan cardiovascular’.
Manera ta conoci KWF Aruba ta enfoca riba prevencion y concientisacion riba cancer. Nos ta enfoca hopi riba tres aspecto cualnan ta come saludabel, move mas y mantene un peso saludabel. Hunto cu esakinan nos ta enfoca hopi tambe riba hiba un estilo di bida saludabel. Come saludabel, move mas, un peso saludabel y un estilo di bida saludabel no ta tur ora metanan realisabel si un persona ta huma.
Estudionan ta mustra cu humamento tin su efecto riba nos salud y hopi bes ora hendenan ta huma, esaki ta bai den combinacion cu dal drinks y come cumindanan cu no ta tur ora saludabel. Y esakinan ta factornan cu por hiba na cancer.
Den cuadro di informa y educa riba cancer y e efectonan cu humamento por tin, Koningin Wilhelmina Fonds Aruba ta lansa e aña aki tres propaganda di concientisacion. Nos ta bai pone atencion riba e efecto cu humamento por tin riba e famia, riba bo cartera y riba bo salud y bida social.
Den e prome propaganda bo ta wak un hoben menor di edad ta drenta un lugar y cumpra cigaria pa un adulto. Loke kier trece dilanti ta cu muchanan cu lanta den un ambiente unda tin humamento, tin mas probabilidad di cuminsa huma nan mes tambe.
Den e siman cu ta bin Koningin Wilhelmina Fonds Aruba ta lansa e otro dos propagandanan cual ta enfoca riba e efectonan pa bo apariencia y bo cartera y tambe e efectonan di humamento secundario, pues e efecto riba bo famia, coleganan y hendenan cu ta diariamente den bo cercania.
Koningin Wilhelmina Fonds Aruba e aña aki a reuni cu entre otro FADA, IBISA y DVG pa asina nos tur ta riba e mesun liña y ta hiba un mensahe unanime afo pa comunidad. Mester gradici nan aporte na e brainstorming pa por yega awe na e tres propagandanan di concientisacion riba humamento. Di e forma aki Koningin Wilhelmina Fonds Aruba kier sigui duna su aporte na concientisacion di nos comunidad riba e enfermedad di cancer paso semper preveni ta mihor cu lamenta.
