Diadomingo atardi, clientenan sinta na e establecimientonan situa riba Linear Park a confronta molester di motociclistanan cu a uza e area aki pa nan por drift. E comportacion sinembargo a spanta tur e clientenan den e area, no solamente cu e brommernan por perde control bin dal den nan sino tambe cu e mesun cos por sosode riba e parkeerplaats na unda tin decenas di auto staciona.
Por lo menos un di e doñonan di un kiosco a vocifera su malcontento pa cu e comportacion aki, cu de facto, ta core cu clientenan for di su cafe. Ya caba, debi na e pandemia y e lista di rekisitonan di DVG pa por maneha un cafe awendia, ya negoshi no ta mucho bon. Tur negoshi ta purba cuida nan clientenan miho posibel, pa nan regresa y pa nan gasta mas.
Pero cu comportacion asina di motociclistanan dilanti bo luga, ta bira casi imposibel pa por sigui haci negoshi eynan. Y locual ta hacie pio ta, cu no obstante ta yama polis, cu e mesun comportacion aki ta sosode mas di un biaha pa siman awo.
Ta parce cu ni cuanto biaha polis controla, duna multa y den algun caso, hasta kita e brommernan for di e motociclistanan, cu toch tin un grupo cu sistematicamente ta sigui bay riba Linear Park pa por drift cu nan vehiculo. Esaki no solamente ta produci un holo stinki di huma, ta susha tur e klinkernan y riba dje, ta forma un peliger serio pa esunnan canando eybanda of pa e autonan staciona den parkeerplaats.
Cu tempop a laga instala “sleeping police” caba riba e strip pa evita cu automobilistanan ta core mucho duro eybanda, pero no a conta riba mal comportacion di motociclistanan. Doñonan di kiosconan riba Linear Park ta spera cu autoridadnan por duna un man pa para e tendencia aki cu cada dia ta birando mas y mas popular, a costo di hacimento di negoshi den e area.
Un di e retonan cu e establecimientonan eynan ta haya nan mes confronta cu ne caba ta e hecho cu hende ta yega eynan, ocupa tur e espacionan den parkeerplaats, ta habri bahul, saca stoel cu jug yena di alcohol y consumie eynan mes. Separa di ta yena e luga y ocupa esacio pa clientenan cu ta bay e cafenan eybanda, tambe nan ta laga e luga sushi, ta causa problema, ta bringa, tira boter y lanta cu polis, siendo cu ningun di nan ta cliente di ningun di e cafenan riba Linear Park.
Durante Toque de Queda mester a pidi intervencion di polis na varios ocasion riba Linear Park pa e mesun situacion aki, cu a causa perdida innecesario cerca e huurdonan di kiosco riba Linear Park cu si mester cumpli cu huur y pago na trahadonan, etc.
