Un homber hopi cansa a accidenta cu e scooter electrico cu e tabata maneha. Esaki a sosode riba e caminda di Playa pa Noord na altura di Turibana Plaza. Un dama tabata den rij di auto wardando pa e sigui bay zuid.
Trafico tabata pega. Diripente el a sinti un klap y mira e homber benta eybou banda patras di e auto. A bati alarma mesora. E homber a keda un rato riba caminda benta y hasta un dokter a baha pa duna asistencia. Dokter Rolin Angela a cuminsa atende pero mirando cu e homber tabata mustra bebi e no kier a coopera masha.
El a lanta y cuminsa cana bay. Polis a yega atende cu e homber. Ambulance tambe a yega. E homber tabata tur sushi na lodo. Parce el a bay core den Saliña cu e vehiculo y a cay. Djey a core bin zuid y dal den e auto. E paramediconan di ambulance a atende cu e homber. A dicidi di bay cu ne hospital pa chekeo mas avansa. Claramente por a mira cu e tabata bebi.
Asina e drenta ambulance y bay hospital ta dificil pa sigui e proceso di test. Polis a tuma datos di tur cos. A confisca e scooter electrico.
