Dialuna 20 di augustus 2018 a tuma lugar e apertura di e aña académico pa e studiantenan di “Organization, Governance and Management” di e Facultad di “Arts and Science” na Universidad di Aruba.
Pa e studiante e siman a cuminsa cu un “motivational speech” cu sin duda a causa un impacto positivo cerca nan caminda cu nan a wordo motiva cu tips nan practico cu nan por aplica den nan estudio y nan futuro carera.
E tabata un comienzo cu hopi energia mirando cu a toca turno na e studiantenan pa cera conoci cu sra.mr. Luenne Gomez-Pieters kende entre otro ta un ex alumno di Universidad di Aruba caminda el a caba su estudio di ley na aña 2001. Sra. Gomez-Pieters, naci na Aruba na aña 1978 a ocupa diferente posicion di maneho durante e ultimo 13 aña nan di su carera profesional y actualmente ta ocupa e posicion di Director di Departamento di Impuesto. Su discurso a carga e titulo “What does it take to meet objectives under constant (budgetary) pressure”.
E puntonan di salida di su disertación ta cu como hoben profesional bo tin cu tuma e mando di bo propio bida y/of estudio y asumi e responsabilidad pa bo mesun futuro. Bo no ta core auto mirando den e spiel patras pero teniendo bo vista fiha ariba bo destinacion. Inspira y motiva, tuma iniciativa y mas importante haci loke bo ta bisa ta aspecto nan importante pa tene como objectivo ora cu bo ta aspira pa bira un manager y/of lider di un organisacion. No tuma “shortcuts” den bida pero aspira pa haci lo corecto, pa ta un hende respeta, confiabel y efectivo.
Pa ta exitoso como lider di cualquier organización bo tin cu realisa cu bo tin cu wak e organisacion den bista di e empleado y crea un atmosfera di confianza cu ta apodera nan den nan trabao. Confiansa ta manera un cuenta bancario, bo lo mester keda deposita ariba e cuenta si bo kier pa esaki crece. Cada persona ta conta y ta importante no obstante nan funcion y/of rol. Cada un persona ta forma parti di e totalidad y exito di e organización caminda cu e proposito general y balornan fundamental ta biba y ta wordo aplica den e organisacion. No tin exito sin eror mirando cu nos ta perfecciona nos abilidadnan pa medio di e erornan cometi. Nos tin cu tene como objectivo pa enfoca ariba e resultado y no reconocimiento como lider di un organisacion. No ignora e poder di reconoce e esfuerzo di bo empleadonan y no lubida cu abo ta determina e tono y e atmosfera di bo organisacion.
Sra. Gomez-Pieters a termina su disertacion ilustrando e storia di “UBUNTU” cu ta un filosofía Africano cu ta nifica cu “Abo ta pasobra nos ta” “I am because we are”.
E disertacion di sra. Gomez-Pieters tabata deriva di su mesun experiencia durante añanan y a comparti su exitonan y desafionandi un manera hopi relaha y te hasta chistoso. Sra. Gomez-Pieterst a haya importante pa menciona cu nos no mester lubida cu nos tin un audiencia cu ta wak, scucha y imita loke nos ta haci como profesional den cualkier ramo di trabao. Y cu nos tin cu inverti den e profesionnan di mayan pa garantiza éxito di nos pais!
