E siman aki Ministernan Xiomara Maduro y Andin Bikker a atende un reunion di “Vierlandenoverleg” cu colega Ministernan di Corsou y Sint Maarten, Secretarionan di Estado di Hulanda di Asunto di Reino, Defensa y Finansa pa por a firma un protocol pa reforsa control di frontera na Aruba, Corsou y Sint Maarten. Den e proximo 7 añanan, Hulanda lo inverti 30,5 miyon Euro den e tres islanan pa combati ilegalidad na fronteranan.
Ya caba ta existi varios protocol pa cooperacion den Reino y e protocol aki tabata necesario pa asina por cumpli cu e punto H11 di e “Landspakket” pa Aruba por sigui haya yudansa financiero for di Hulanda. E hecho cu ministernan di finansa y husticia tabata na mesa ta precisamente pa garantisa cu e fondonan ta yega na Departamento di Duana y na Cuerpo Policial Aruba, Guarda nos Costa, Wardacosta di Caribe Hulandes y eventualmente na Koninklijke Marechaussee cu pronto lo cuminsa controla na fronteranan tambe.
Cada pais lo traha riba un plan den cual ta señala e necesidad cu nan tin pa por reforsa e control di frontera. Pa locual ta trata Aduana di Aruba, e protocol aki lo trece yudansa den forma di training y material necesario.
