Diamars anochi den Cage Night Club Miss Gay Organization a presenta e 5 participantenan pa Miss Gay Aruba 2019 na publico.
E participantenan a cuminsa cu training for di luna pasa bou direccion di e coreografo Eduardo Parraga y director Humphrey Odor. E aña aki organisadonan a bini cu un concepto un poco diferente unda cu cada participante ta presenta su mini pre-show na e publico y prensa, cu a tuma luga diamars anochi. Di e forma aki yuda nan pa tin un plataforma pa sa con e show final lo bay ta. Hopi di nan nunca a pensa di ta participando den un show asina aki y mas ainda, cu ta bay exigi tanto di nan persona.
Na september ta bay tin un sesion di foto atrobe, unda nan por presenta 3 potret di nan preferencia pa bay competi pa Miss Photogenic 2019.
E certamen final mes ta tuma luga den Renassaince Convention Center riba diadomingo, 13 di October. E dia aki porta lo ta habri di 7.30pm y show lo cuminsa pa 9’or en punto.
UN POCO DI E PARTICIPANTENAN
Aki ta sigui algun detaye di e participantenan pa Miss Gay.
# 1 Kristina Oelers
Kristina a yega di participa den pasado y a gana caba Miss Gay na aña 2015. E ta participa cu e intencion pa logra bay cu e corona pa di dos biaha.
#2 Sharim Cohen ta participando pa prome biahe den un concurso di e magnitud aki. Sharim ta un bailarin profesional di Venezuela y ta residencia actualmente na Aruba. E ta participa pa gana e titulo maximo di Miss Gay Aruba 2019, el a bisa.
#3 Amber Haze
Amber ta un hoben Arubiano cu hopi tempo caba tawata kier a participa, pero nunca a haci esaki pa motibo ta un persona hopi timido (shy). Sinembargo cu ayudo di famia y amistadnan, kendenan ta apoy’e cu training y coaching pa participa den un evento asina grandi, el a inscribi su mes.
#4 Kimora Lee Jones
Kimora a participa caba na aña 2013 y a logra e titulo di 1st Run Up, pero e aña’ki e ta bini pa bay cu e corona mes.
#5
Anna Paula Riera. E participante nobo aki a inscribi y di loke a mira di dje te awo, el a sorprende tur hende cu su prome presentacion den publico diamars anochi. Esaki apesar cu e ta un persona super timido y no tin ningun experiencia riba escenario, ni den show ni den eleccion. Pero diamars anochi por bisa cu Anna Paula a logra di pone tur cu tin pa luci cu su presentacion y awo ta sinti su mes mas sigur pa bay pa e final.
Na tur participante ta bay palabra di exito.
