Na Biblioteca Nacional Aruba lo tuma luga un encuentro literario cultural linguistico internacional. Ta haci esaki den cooperacion cu Biblioteca Nacional Aruba, Departamento di Cultura Aruba y Mirto Laclé.
E encuentro aki ta tuma luga diahuebs, prome di juni 2023, di 6:00 p.m. pa 9:00 p.m., lo tin un actividad na Biblioteca Nacional Aruba, George Madurostraat 13 cu encuentro literario cultural linguistico internacional. Biblioteca Nacional Aruba, Departamento di Cultura Aruba y Mirto Laclé lo presenta un programa multidisciplinario cu enfoke riba dicho y proverbio ‘Sabiduria Popular ta di nos tur’ cu charla, canto, baile, declamacion, musica, cultura y educacion en general.
drs. Mirto Laclé, linguista, a indica cu como invitado special y orador lo tin Domingo “Wini” Paulo for di Corsou cu lo presenta su buki nobo di proverbio y dicho na Papiamento Biba Palabra.
Tambe lo ta presente Grupo di Baile Mardi Gras for di Corsou, bou direccion di Jacqueline Nicia y Rudmila Alexander cu lo deleita publico cu algun baile.
Como invitado special for di Boneiro Boi Antoin lo presenta un charla encuanto ‘Diferencia y Similaridad entre e palabranan na Papiamentu/o di e islanan ABC’ y tambe di “Beinamen specifiko di Boneiru’.
Glenda Tromp-Geerman lo duna un cordial bonbini cu su caha di orgel Desiree. Cantante Antonieta Ras-Booi lo entretene cu algun cancion. Munye Oduber-Winklaar lo recita algun poema relaciona cu Conmemoracion 160 aña Abolicion di Sclabitud. Mirto Laclé lo duna un introduccion y recorido di Historia di Proverbio y Dicho.
Lo ta obtenibel e buki nobo di proverbio di Wini Paulo Biba Palabra. Laga nos disfruta y celebra. Entrada pa e anochi aki ta gratis. Pa mas informacion por tuma contacto cu Mirto Laclé na number di celular 7426274.