Pa comercio y trahadonan por surpasa e crisis economico cu COVID19 ta trece cu ne, Gobierno di Aruba ta ofrece yudansa den forma di Subsidio di Salario. Desde mei companianan cu ta bin na remarca pa e yudansa aki ta wordo notifica door di SVB y ta haya un plazo di tempo den cual mester aplica pa e yudansa aki pa por cubri un maximo di 60% di e salario di trahadonan. Meta di e yudansa financiero aki ta pa durante e crisis di COVID19 por conserva cupo di trabou na beneficio di nos economia. Den luna di juli 2020, un total di 1457 compania a haya Subsidio di Salario pa por cumpli cu e salario di 21162 trahador. E suma concerni ta 34.8 miyon florin.
E registracion pa Subsidio di Salario pa luna di augustus a cuminsa dia 21 di augustus y lo sigui te cu 27 augustus 2020. Lo haci e pagonan corespondiente entrante dialuna dia 31 di augustus 2020. Consecuentemente companianan lo mester procesa e pago aki te dialuna pa su trahadonan, cu chens grandi cu e luna aki hopi hende lo cobra laat.
Pa pregunta riba Subisidio di Salario por tuma contacto cu SVB su Service Center via [email protected] of subi www.svbaruba.org.
