Despues di a para duro cu no por pasobra e no ta cuadra cu e locual minister-president a firma cu Gobierno di Hulanda como condicion pa Aruba haya fiansa, un rato pasa Minister Geoffrey Wever a anuncia durante un entrevista exclusivo cu Tito Lacle di NoticiaCla, cu el a cambia di posicion y cu a dicidi hunto cu gerencia y directiva di SETAR cu tur trahado ta haya 13de maand salario, di acuerdo cu nan contracto colectivo di trabou. Cu esey, a kibra e discrepancia cu a existi entre SETAR, WEB, ELMAR y Aruba Airport Authority N.V. entre otro.
E mandatario a splica si cu de facto, no ta un 13de maand di “christmas bonus” sino a cambia e nomber di e bonus. A mantene e recorte di 12,6% den cual e trahado ta haya solamente 50% di su bonus di Pasco pero pa completa e resto di 50% a introduci un “performance bonus” cu ta igual na mita luna di salario di tur trahado. Esaki ta bin, pasobra segun e Minister di Telecomunicacion, cu alabes sta representa Gobierno como e unico accionista di e compania, cu SETAR a bay bon y a haci hopi ganashi e aña aki. Como cu e compania a “perform” bon, a opta e ora pa comparti e ganashi aki den forma di un “performance bonus” cu tur trahado. Un decision cu e minister nobo ta haya na su luga y cu ta hustificabel.
Un rato pasa e sindicato STT a anuncia e “bon noticia” aki pa tur su miembronan afilia riba nan pagina cera di Facebook. E sindicalista Jeromin Kelly a considera esaki un logro grandi pasobra na final, a logra cu tur trahado ta cobra henter nan luna di salario, pues sea cual sea e nomber cu a duna e “bonus” e ta igual na bo salario dos biaha. Pa e relato completo, lesa TREMPAN di awe.
