E tabata un fecha cu hopi tabata anticipa p’e, esta 31 di december 2022. Un fecha cu Minister Ursell Arends a anuncia cu lo ta ultimo dia pa tira sushi na dump mirando cu lo cer’e. Papia su malo, papia su bon, el a cumpli. Desde prome di januari 2023; ningun hende por tira sushi riba dump mas. A asigna diferente compania unda por hiba sushi, tin cu costo y otro no.
Di otro banda a nota diferente polemica riba rednan social tocante ceramento di dump. Tin cu no tabata sa, otro preocupa cu e pagamento, otro a nota mas pickup den bario ta tira sushi den bario, pero Minister Arends durante un entrevista cu 24ora.com a duna di conoce cu e ta na altura di e situacionnan aki.
A nota su presencia pafo di dump diaranson anochi mirando cu tabatin candela riba dump. For di atardi Bureau City Inspector a nota candela riba dump y a bati alarma mesora.
Na nan turno a notifica e instancianan concerni pa atende cu e candela. Minister Arends ta stimula un y tur pa sigui e pasonan necesario y no tira sushi den mondi. Pa Arends mes, e ta sinti cu esaki ta un logro pa Aruba henter, cu pa despues di 70 aña, ta cera dump y atende di un manera responsabel cu desperdicio di nos isla.
