Dia 8 di november 2018, e compania Natura Development NV (Embassy Suites) a presenta un peticion pa ocupacion di (parti di) e terenonan situa dilanti di e proyecto hotelero, pa nan por construi of amplia e beach dilanti nan hotel. A pidi permiso pa proporciona e instalacionnan di beach necesario n’e huespednan di e hotel y e construccion di un tunel subteraneo pa crusamento sigur di e huespednan di e hotel p’e beach.
Tabata na 2019 cu e director di DIP, ing. Haime Croes cua otorga un permiso n’e hotel Embassy Suites pa traha un tunnel pa conecta hotel na beach na 2019. E compania a haci un inversion grandi pa esaki pa despues DIP cambia di opinion y cu nan no por haya e beach mas. Mientras, nan bisiña, Divi Resort si a haya dicho permiso y awo a pidi pa ampliacion tambe.
Durante un conferencia di prensa, Minister di Naturalesa, Ursell Arends, a cuminsa na bisa cu prensa mester ta mas obhetivo y veridico na momento di duna noticia. Segun e mandatario tabata dos siman pasa cu prensa a tild’e di ta faborece e mesun hotel aki, door di dun’e permiso pa habri un beach priva, cu den medionan internacional ta propaganda esaki. Y awo e noticia ta bolter, acusando Gobierno di boicotia nan y no duna e hotel aki beach.
E mandatario a indica cu mester ta consistente ora cu ta comunica cu comunidad. N’e momentonan aki e departamentonan di Gobierno mester duna nan conseho riba peticionnan haci y ta basa nan mes riba e consehonan cu Gobierno ta haya for di nan expertonan den e aparato publico.
