Diabierna ultimo a presenta e rapport final di Trash2Cash. E rapport a ser compila pa e grupo diverso di 12 panelista cu tabata presente durante e evento di Pitch & Switch caminda 24 compania a presenta loke nan ta of por haci pa procesa un of mas tipo di desperdicio, asina tambe conoci como “waste streams”.
Di e presentacionnan na e Pitch & Switch e panelistanan a evalua tur e proposicionnan ricibi basa riba beneficio pa hende, planeta y prosperidad y cu esaki a traha e raportahe cual a keda presenta.
E plataforma di Trash2Cash lansa riba 22 februari 2022 door di Minister Ursell Arends, cu e promesa pa reduci, reuza of recicla desperdicio produci y importa na Aruba. Importante tabata pa inventarisa tur actividad y capacidad existente, pa asina marca e comienso di e proceso di diseña un Waste Policy pa Aruba.
E meta principal ta pa cera dump di Parkietenbos pa fin di 2022, pa por logra esaki tin cu cuminsa na desvia e fluho di desperdicio mas pronto posibel.
Trash2Cash NO tabata un competencia; e pensamento cu participacion na e evento aki lo a conduci na cualkier contract cu gobierno ta completamente eroneo. Minister Arends a enfatisa cu gobierno no por simplemente impone un decision, contrario na pensamento di algun politico cu a expresa esaki. “E no lo ta responsabel ni realisabel, mirando cu mester tene cuenta cu actividad y capacidad actual”, Minister Arends ta opina.
Pa e motibo aki tabata importante pa traha inventario di actividadnan existente, y tambe retonan cu gobierno por facilita un solucion pa nan – por ehempel legislacion manera un Waste Policy.
Den e proximo fase e stakeholdernan selecta lo participa den e diseño di e Waste Policy. E resultado final lo ta un plan di maneho di desperdicio acapara cu ley y regulacion corespondente pa por tin control riba kico, cuanto, unda desperdicio ta ser colecta, hiba y procesa.
Ministerio di Naturalesa ta keda enfatisa cu ningun compania di desperdicio lo ta exclui di e solucionnan proponi, ni awo ni den futuro. No lo tin faboritismo ni tampoco ningun monopolio permiti den e maneho di desperdicio.
Un danki di curason ta bay na e panelistanan pa nan contribuicion y evaluacion, y na e participantenan pa nan trabou y dedicacion, pa por a presenta nan vision y asina contribui na Aruba su meta di yega na un maneho di desperdicio sostenibel.
Link pa raportahe: https://bit.ly/3aKsKLh
