Minister di Integridad, Ursell Arends, a haci un yamada na e entidadnan publico y semi-publico pa acudi na un congreso consultativo cu lo tuma luga dia 3 y 4 di november na Universidad di Aruba. Ambos dia lo enfoca riba e legislacion nobo riba e tereno di corporate governance.
“Good corporate governance ta un elemento esencial den e funcionamento di sector publico y semi-publico”, asina minister Arends a comenta durante un conferencia di prensa. Durante e congreso lo elabora detayadamente riba e concept-Landsverordening, cu lo ta presenta pa consehero huridico, mr Carlos Guiamo.
Gabinete Wever-Croes II tin e ambicion pa fortalece e practicanan di Good Corporate Governance den e entidadnan publico y semi-publico mas pronto posibel y a base di e miho standardnan internacional (“best practices”). Minister Arends hunto cu e voorzitter di e Commissie Corporate Governance, Jossy Laclé, a haci un yamada special na tur entidadnan pa nan participacion activo.
Good Corporate Governance ta rekeri esfuerso humano. Feedback di esunnan cu ta labora den e veld di entidad publico y semi-publico ta sumamente importante pa gobierno. “Participacion activo ta e forma cu Ministerio di Transporte, Integridad, Naturalesa y Asuntonan di Adulto Mayor ta traha legislacion y maneho conhunto cu esnan envolvi”, segun minister Arends. Ademas di esunnan laborando den e veld, tambe lo brinda oportunidad na e studiantenan di Universidad participa na e congreso consultativo.
Den e proceso di implementacion mester tene cuenta cu e circumstancianan special cu tin na Aruba manera e limitacion na recursonan y capacidad di cada entenidad como tambe e sociedad cu ta uno chikito. E obhetivo ta pa hunto haci e pasonan pa realisa “excellent corporate governance”. A base di e vision aki na mei 2020 a instala e “Commissie Corporate Governance”.
E tarea di e comision aki ta pa duna conseho y aporta sosten na Gobierno pa implementa legislacion cu lo sirbi como e fundeshi pa Corporate Governance. A uza e structura cu ya ta desaroya door di Banco Central como e base. Ordenansa Nacional y e codigo di Corporate Governance ta e productonan mas recien di e comision. Stakeholders tin awor tin e oportunidad di cera conoci cu e legislacion y tambe pa duna feedback riba esaki nan.
Si bo kier forma parti di e congreso consultativo, bo por manda un email cu bo nomber, funcion, telefoon y email adres na [email protected]
Tene cuenta cu cupo ta limita y ta completamente gratis pero cu si surpasa esaki lo evalua pa haci e congreso un biaha mas. Pa mas informacion por tuma contacto cu e secretaria di e comision “Corporate Governace” Drs. mr. Hellen van der Wal via [email protected]
