Parlamento a tene reunion cu Minister Presidente mr. Evelyn Wever-Croes riba e Landspakket. Durante e reunion a trata diferente topico cu tin di haber cu e Landspakket, unda a haci diferente pregunta.
Lider di partido MAS, drs. Marisol Lopez-Tromp, a enfatisa cu durante e reunion a haci pregunta na tur esunnan presente, e hefenan di departamento entre otro of esunnan envolvi cu ehecucion, implementacion, preparacion pa loke ta e Landspakket. Mas o menos diescinco pa diesseis persona tabata presente cu minister presidente y e parlamentarionan a haci pregunta.
Un di nan ta e preocupacion cu e parlamentario ta haya di pueblo y el a vocifera, ta e parti di embehecemento (vergrijzing). Gran parti di poblacion ta di edad avansa y si nan ta tene cuenta cu e aspectonan riba tur e cambionan cu ta bay bin. Un di e kehonan ta entre otro e parti di remedi, y e lista di positivo a cambia. Tambe tin hopi keho cu hende ta paga riba cierto remedi y e ta gasto pa nan, con dificil y mas.
Segun Lopez-Tromp, nan a haci pregunta si den tur aspecto di cambio, e parti di salud, si a tene cuenta cu e parti pa pueblo. Tambe kico tur ta bay cambia a base di embehecemento. Fraccion MAS sa cu e gastonan ta halto pa esunnan di edad avansa y a haci pregunta pa nan splica un poco mas riba e parti aki, si ta tene cuenta cu grupo di hende cu enfermedad cronico. Tambe si ta tene debido cuenta riba tur reforma y cambio p’esaki.
Incluso MAS a bay riba e parti di pensionado, e belasting cu nan ta paga y si a tene cuenta cu lo bay ta simplifica of alivia e parti ey. Lider di fraccion a puntra riba e rapport di CAD, ya cu e director tabata presente. A puntr’e si e rapport cu CAD ta saca tur aña cu a pasa, cu si investigacion pero tambe gobierno ta sigui e consehonan duna na nan den e rapport aki. Den e rapport ta bin basta conseho y cu si e director a mira cu gobierno a haci e cambionan cu nan ta propone. Loke a haya como contesta dje director ta cu nan no por haci esey pasobra nan falta personal.
Lopez-Tromp ta mira e parti ey ta importante pasobra ta traha rapport pa mehora, cambia, drecha, etc. banda di aspecto investigativo. Fraccion MAS a haci diferente pregunta y, segun Lopez-Tromp, lo bay tene mas reunion riba e topico aki den e comisionnan.
