Minister Rudy Lampe a splica cu e reunion di supletorio den Parlamento sigur lo ta uno largo. Di parti di su ministerio mester haci un adaptacion di su presupuesto. No cu el a bin pidi pa mas placa, sino ahustacion door cu a logra spaar casi 25 miyon florin durante 2020.
E vision tras di esaki tabata pa haci uzo mas eficiente di e placa di pueblo pa despues inverti’e bek den enseñansa.
Tur hende sa cu pa hopi aña, enseñansa mester di mas inversion, pa loke ta renobacion di scol, pa loke ta profesionalisacion di maestronan y hasta tabata tin plan cu e placa aki pa dia 1 di januari 2021, lo a bin cu sistema di remuneracion pa e maestronan extra, a base di nan meritonan.
Un sistema uza na otro paisnan, pasobra nos maestronan, ora cu nan cumpli 38 aña di edad, nan a yega nan plafond, nan a yega nan top. Pesey kier a bin cu un sorto di estimulo financiero pa e maestronan despues di 38 aña, pa duna nan algo extra a base di nan prestacion.
Tur esey tabata tin planea pa uza cu e placa aki. Lamentablemente COVID a bati na porta y e ora ey e placa aki cu a spaar pa por reinverti den enseñansa a bay entre otro pa paga FASE, tur esnan cu a perde trabao pa nan haya pan riba mesa.
Den parlamento a bin pa pidi aprobacion pa e ahustacion aki cu a haci.
Den e caso aki a determina door di e realidad di e crisis di COVID. Aruba ta den un problema di likides hopi grandi y prome minister a cuminsa splica cu ta apunto di yega na un acuerdo cu Hulanda pa un ayudo financiero. Sin e apoyo ey no por cumpli cu obligacionnan.
Spaarmento
Segun e mandatario, a logra e spaarmento door cu a wak unda tin fondonan cu no ta uza na un manera eficiente y esey ta yama na Hulandes “doelmatig gebruik van je middelen”.
Hasta por bisa cu ora cu no ta haci uzo eficiente di placa di pueblo, e ta un forma cu ta falta respet pa e placa di pueblo.
Bo por malgasta tambe placa di pueblo den e sentido cu no ta hink’e, no ta uz’e di un manera eficiente. P’esey a wak unda lo por haci uzo mas eficiente, entre otro den loke ta e cantidad di alumno cu tin pa klas. Kiermen e cantidad di klasnan.
E cantidad di pensionadonan cu ta emplea. A aplica e norma di Bermudez introduci bao di gobierno anterior y awor aki a aplik’e.
Pa loke ta “overtime” cu ta den discusion awor aki, entre otro eynan a bin cu un maneho mas estricto y den e periodo di COVID aki, hopi hende tambe ta ripara cu pa tin un trabao cu un salario, ya ta algo hopi grandi den un periodo di pandemia.
Pasobra hopi hende a perde trabao y no tin nada. E hecho cu a reduci e overtime, esey tambe a hiba na e besparing aki.
Pa loke ta full e discusion cu e trahadonan di limpiesa di SKOA, eynan tambe a logra baha gasto, sin tin mester di a laga e trahadonan sin entrada, cumpliendo cu un sentencia di hues, unda cu e subsidie cu ta duna, e ora ey ta cay bao di exploitatiekosten y esey tambe a hiba na un reduccion di gastonan.
Ta insisti cu e trahadonan di limpiesa por keda cu un entrada. Asina aki a purba cu mantene e calidad di enseñansa, mientras cu ta haci uzo mas eficiente di e fondonan y un hende por pensa cu a corta gasto y cu esey lo afecta enseñansa y no ta asina.
Pesey a splica den Parlamento, hopi proyecto nobo cu a bin cun’e, apesar cu tabata tin menos placa, por a haci mas.
Tin cu haci e placa rindi mas y esey ta loke ta logrando den enseñansa. Por a splica Parlamento tambe cu tin un rapport di World Bank, cu ta conseha Gobiernonan rond mundo, cual ta pa introduci agricultura, pero tambe a conseha pa loke ta ministerio di enseñansa, cu no necesariamente mas placa den enseñansa, esta mas calidad di enseñansa.
Nan a mustra cu hopi pais a inverti hopi mas placa, pero e resultado a bay atras. Eynan ta mira exactamente cu no necesariamente mas placa, kiermen mas calidad y no necesariamente menos placa kiermen menos calidad. Di parti di e minister, e proyectonan di innovacion ta mustra, aunke ta menos placa a keda inverti, toch ta haya mas resultado.
