Minister Dangui Oduber tabata tey presente representando su ministerio di Salubridad, Deporte y Turismo. E ta conta cu e presupuesto supletorio ta uno importante pa pais Aruba den e pandemia cu ta aden na e momentonan aki.
E aprobacion aki ta hopi necesario pa por garantisa cu tin sumanan disponibel pa paga FASE, loonsubsidie, ayudo pa empresanan chikito y mediano, bijstand y pa mantene e pais operacional.
Tambe e presupuesto supletorio aki ta importante pa e fondonan adicional cu ta necesario pa combati COVID, pa e departamento di Salub Publico.
Den e presupuesto supletorio aki a presupuesta 1.5 miyon adicional pa cubri e gastonan extra cu a bin pa motibo di COVID, teniendo cuenta e cantidad di casonan a bin despues di 4 di augustus.
Mester a reenforsa e departamento di Salub Publico. Mester a reenforsa e team di isolacion y cuarentena, reenforsa e team cu ta controla negoshi. Percura pa ta prepara pa si en caso bin mas caso pa organisatoriamente ta mas fuerte para cu anteriormente.
Tabata sa cu lo a haya mas caso den luna di augustus. Na momento cu habri frontera por premira ya caba cu ta haya casonan nobo, pero nunca por a pensa cu lo a haya e gran cantidad di casonan aki.
Pesey mes tabata tin mester di e fondonan extra. A amplia e capacidad di cuido intensivo. A busca 50 personal extra pa por yuda na hospital, cu a yuda enormemente. Ta hopi satisfecho con e ta bayendo. Di 1600 caso activo seis siman pasa, awe tin menos cu 200 caso activo.
A pone como meta cu kier reduci e cantidad di casonan positivo bao di 30 pa dia.
Ya caba ta rond di 10 pa 12 caso positivo nobo pa dia. A bisa tambe cu kier baha e positivity rate bao di 10%. Tambe ta logrando esaki y ta cuestion pa mantene e disciplina, sigui e protocolnan pa hunto sigui p’adilanti. Ta bay drenta den e temporada di High Season, cu ta hopi importante pa nos economia, pa finansas publico, pa mantene cuponan di trabao.
Awor aki mas cu nunca, tur tin cu haci un extra esfuerso pa mantene e casonan abao. Esey ta e unico manera cu por sigui mantene nos economia y nos frontera habri.
Nos por wak rond mundo, por mira na Hulanda, na Inglatera, na Spaña, na Italia, na Francia, tur e paisnan aki, sea a bay den lockdown of ta considerando lockdown. Na Aruba, manera cu a habri frontera na juni, a mantene e balansa di salud y economia y ta spera di por mantene manera cu el a bin ta pasando e ultimo seis pa shete simannan.
E presupuesto
Den e ministerio di Oduber, a purba di mantene e gastonan hopi abao. Loke a bin acerca ta e 1.5 miyon pa e gastonan adicional cu COVID a trece cun’e. El a pone un presion enorme riba e departamento di Salud Publico.
Manera cu a bisa, tabata sa cu lo bin casonan nobo, pero pa por tin un miho control di e virus, pa por controla esnan cu ta positivo na cas, si nan ta isolacion of cuarentena, mester a reenforsa e departamento.
Pesey a pidi sumanan adicional. Y awe tambe a informa Parlamento, a duna un update riba henter e proceso di Cannabis Medicinal, kico a bin ta haciendo como Gobierno, cu a adapta y cambia e Landsverordening Verdovende middelen. Esaki a sali for di Raad van Advies, pa DWJZ. Una bes cu e naderrapport keda cla, e lo ta cla pa trata den Parlamento di Aruba, pa asina debati riba esaki, caminda ta brinda e posibilidad si Parlamento bay di acuerdo cu e ley aki, si nan aproba e ley aki, lo brinda e posibilidad pa cultivacion di Cannabis medicinal pa exporta esaki.
E ta un industria nobo. E por bira un pilar economico nobo.
Deporte
E siman aki crisis team lo tuma un decision pa reactiva tur deporte. Si mester tene cuenta cu aglomeracion y probablemente e siman aki lo duna green light pa tur deporte cuminsa na Aruba. Ta bay over tambe na reactiva e campeonatonan, pero sin publico.
Esey ta e decision cu ya caba a tuma. Ta cuestion di haya e aprobacion oficial di e team di maneho pa asina por reactiva deporte cu ta hopi necesario tambe den e temponan aki di crisis.
