Despues di e accion masal di maestronan dialuna mainta, Minister encarga cu enseñansa a dicidi di bay riba Facebook pa duna su banda di medaya pa loke ta e accion. “Mentira, mentira, tur cos ta un mentira,” e mandatario a bisa como e motibonan di e accion di e maestronan y loke cu a skirbi den carta pa mayornan.
Rudy Lampe, encarga cu Encarga cu Enseñansa, Ciencia y Desaroyo Sostenibel, a bisa cu tur hende tin derecho di tin su mesun opinion y tambe di protesta. Pero “ e carta pa mayornan bisando cu San Nicolas lo no tin scol publico, no ta berdad.”
Loke si ta berdad ta cu a constata cu e atendencia di scolnan publico na Noord y Playa a subi basta, mientras cu e cantidad di alumnonan pa esnan di San Nicolas a baha drasticamente. P’esey a cuminsa papia di nada otro cu un cooperacion entre directivanan di e scolnan. “Ningun momento ta kita scolnan publico di San Nicolas. Na augustus ora cu scol cuminsa lo tin scolnan publico na San Nicolas.”
E mandatario a desmenti cu Commandeur Pieter Boerschool ta bay cay bou di Stichting Protestants Christelijk Onderwijs Aruba (SPCOA) y tampoco a prohibi niun mayor pa inscribi nan yiu na e scol aki. “Ta mayornan no a inscribi nan yiunan na e scol pasobra nan no kier. Loke si nos a bisa ta cu ta bay cuminsa un dialogo di ki tipo di cooperacion ta bay bin entre e scolnan.”
Loke a bisa den carta pa mayornan cu Abraham de Veer School ta bay cay bou di SPCOA tambe ta un mentira, segun e mandatario. A constata cu e cantidad di alumnonan na e scol aki ta bahando, pa cual a pidi pa cuminsa un dialogo entre nan y John Wesley College pa mira si por yega na un forma di cooperacion entre nan dos.
Tur e puntonan aki, segun e mandatario, ta bay a base di dialogo cu ta cuminsa na augustus, 2020.
Cu Colegio San Nicolas ta bay bou di De Schakel ta otro mentira, Lampe a bisa. “Colegio y Cuerpo di docente ta esnan cu lo bay dicidi si e ta bira un scol bilingual.” Rapportnan ta bisa cu e miho opcion, y segun tendencianan mundial, ta pa Colegio San Nicolas bira un scol bilingual. Den cuadro di esaki, mirando e programa di De Schakel, a pidi pa haci uzo di e experticio di e instituto educativo aki, o sea pa pone na disposicion di Colegio San Nicolas den e evaluacion di e decision cu nan mester tuma si ta bira un scol bilingual.
Den e caso di Prins Bernhard School, e no ta bay stop di existi tampoco, segun e mandatario. Tampoco ta berdad cu e schoolgeld ta bay cambia. Tur schoolgeld ta bay keda mescos. El a recorda cu loke ta duna na Prins Bernhard School ta un programa y no un scol. Mayoria di e muchanan aki na final ta bay EPB. E mandatario ta bisa cu mester bin un sistema nobo, na Ingles y Spaño di K-12. Cu esaki ta amplia e oferta educativo y ta haci esaki cu fondonan poni disponibel door di Hulanda pa refugiadonan. Di e forma aki ta bay crea e prome scol online pa migrantenan.
Den e caso di Scol Paso pa Futuro, cos tampoco manera ta bisa. No ta bay parti of dividi e scol aki. E ta un scol di 1 te cu 6de klas. E adultonan a crea un di 7 klas. E studiantenan di e 7de klas tin e derecho pa ta na un scol secundario, cual ta SPO. Edificio na Sero Blanco ta den preparacion basta tempo caba pa Scol Paso pa Futuro mirando cu nan birando chikito. Aworaki en realidad nan ta den un edificio cu ta apto pa un scol grandi.
SPO Santa Cruz y Brazil tampoco ta bay “merge”. Cada un ta keda existi, pasobra nan tin suficiente alumno. CU EPB no ta bay tuma docente nobo y ta bay merge cu EPI tampoco ta cuadra, el a bisa. Tur lo contrario ta sosode. Ta bay duna mas atencion na tanto EPB como EPI pa prepara e studiantenan debidamente pa un ofishi. “Si mester docente, lo pone mas docente disponibel. Ta bini cu un programa nobo cu ta continuacion di un estudio di ofishi. SPO no mester ta e ultimo station den e sector di enseñansa aki. Nan mester sigui pa EPI y hopi mas leu. Nos no a bisa cu nan mester merge, pero kier mira un miho forma cu e fluho di EPB ta yega na EPI. Awor mayoria di nan studiantenan (di EPI) ta bini for di MAVO.,” e mandatario a bisa.
Tambe el a papia cu ta bay cambia DPS (di scolnan publico) pa Directie Financien en Uitvoering pa Scolnan Publico, pero esey no ta nifica cu scolnan publico ta stop di existi. E ta bay na un miho forma pa uza e finanza cu ta placa di pueblo. E klasnan tampoco ta bira di 35 studiante, aunke awo ya caba tin klasnan di 33 studiante siendo cu legalmente ta 28 studiante por tin. E ta un “gedogen beleid” di hopi añas caba.
Pa finalisa, el a bisa cu tampoco ta berdad cu ta bay kita cabesantenan di scol. Esnan cu yega edad di pensioen mester bay disfruta di nan edad di pensioen. “Pues tur accion ta basa riba mentira.”
