Minister di Infrastructura René Herdé a indica cu gobierno tin un total di 12 miyon florin disponibel pa inverti den construccion y drechamento di cayanan durante e aña aki. E seleccion di e cayanan ta depende di un evaluacion tecnico di DOW, cu a identifica e camindanan cu ta den estado pio.
Minister di Infrastructura René Herdé a reconoce cu e estado di hopi caya na Aruba ta preocupante, despues di añanan di falta di mantencion y negligencia. Segun e minister, e falta di placa ta un di e obstaculonan principal pa atende e situacion.
Herde a splica cu gobierno tin 9 miyon florin for di Fondo di Desaroyo pa asfalt y otro 3 miyon florin den e presupuesto di DOW pa e aña aki. Cu e total di 12 miyon florin, gobierno kier cuminsa cu diferente proyecto di construccion y drechamento di cayanan den e lunanan cu ta bin.
Un di e limitacionnan cu e sector ta enfrenta ta e cantidad limita di companianan di asfalt na Aruba. Actualmente tin solamente dos compania, loke, segun Herde, tin influencia riba e prijs di trabou. E minister a indica cu den diferente proyecto e costonan a resulta mas halto pa motibo di e situacion aki.
E mandatario a menciona tambe cu, cu sosten di Ministerio di Turismo y Minister Dangui Candelaria-Cecilia, gobierno por cuminsa cu e proyecto di e caminda na San Nicolas, na entrada di Sero Colorado. E caminda aki tabata ta spera mas cu 40 aña pa construccion.
DOW ta determina cua cayanan ta haya prioridad
Un pregunta cu e ta ricibi frecuentemente di habitantenan ta cua cayanan lo haya atencion. Habitantenan di San Nicolas, Sero Preto y Tanki Leendert, entre otro, ta pidi pa gobierno atende e mal estado di nan cayanan.
E minister a splica cu gobierno no kier limita su intervencion na tapa buraco, pasobra e tipo di reparacion no ta dura hopi tempo. P’esey, cu e presupuesto limita, gobierno a pidi DOW pa determina di forma mas obhetivo cua cayanan mester haya prioridad.
Segun minister, e departamento a uza su sistema tecnico pa identifica e cayanan cu ta den e peor condicion. E seleccion di e proyectonan lo tuma luga basa riba e evaluacion aki.
Mientras tanto, gobierno ta trahando riba e presupuesto di 2027 cu e intencion di sigui cu e trabounan di infrastructura durante otro aña.
