Un doño di cas, Nemesis Quant, a haci un denuncia publico contra un grupo di huurdo cu, segun e, a causa diferente daño na su propiedad. Loke a cuminsa como un acuerdo di huur p’e periodo di januari te december 2026, a termina cu desordo, molester y instalacionnan daña. Quant ta cuestiona ken lo paga e gastonan di reparacion.
Quant a splica cu inicialmente cuater persona Ecuatoriano a bishita su cas, a wak e prijs y a acepta e contract. Sinembargo, ora nan a muda aden, el a descubri cu dies persona tabata bibando den e propiedad. Despues di a consulta cu su casa, el a dicidi di duna nan un oportunidad. Segun e denunciante, e pago di huur tabata cana bon. E huurdonan tabata paga dia tres di cada luna, manera e contract tabata stipula. E problemanan a cuminsa cu nan comportacopm.
E prome incidente a sosode durante un reunion cu amigo, caminda nan a grill y canta Happy Birthday pa un baby. Pa 10:00 PM tur cos tabata keto, pero pa 3:00 AM Quant a tende grito, palabra malo y boter di cerbes ta cay. El a yama su casa pa keda na telefon mientras el a bay controla. Inicialmente e huurdonan no kier a habri porta. Ora finalmente nan a habri e porta, el a haya boter kibra, cerbes plama, desordo y hende casi sunu canando den cas. Hasta mucha tabata presente. Un homber tabata asina burachi cu casi no por a para. Segun Quant, ora el a reclama, e huurdonan a argumenta cu nan tabata pagando huur y p’esey tabatin derecho di haci loke nan kier. El a rechasa esaki y a manda e bishitantenan cas.
E di dos incidente tabata relaciona cu bebemento dilanti di e propiedad. Segun Quant, e huurdonan tabata tira botter di cerbes riba caminda publico, creando peliger pa automobilista y bisiña. El a menciona tambe botter tira den mondi rond di e cas.
Durante otro incidente, un bebemento a cuminsa diabierna pa 7:00 PM y a continua te 10:00 AM di e mainta siguiente. Tabatin botter kibra, desordo y pelea. Quant a yama polis. Segun Quant, solamente cuater di e dies residente a presenta nan documento, mientras seis a keda paden. El a indica cu anteriormente el a pidi carta di trabao pa completa su administracion, pero no a ricibi nan. No a confirma oficialmente su preocupacion tocante documentacion migratorio. Quant a denuncia tambe daño n’e airconan, cu segun e a keda forsa pa fria henter e cas. Ora el a reclama, e huurdonan a cuestiona dicon nan mester paga si e aparatonan ainda tabata funciona. El a splica cu su propiedad tin tecnologia moderno, incluyendo fingerprint y control via telefon. A cumpra diferente acesorio via eBay cu su propio placa. Hasta e baki di laba man a causa discusion. Quant a menciona comentario riba Facebook tocante prijsnan di huur, pero no a presenta prueba cu su propiedad tabata bao subhuur.
Despues di casi un aña, e huurdonan a sali for di e propiedad, segun Quant, lagando diferente daño atras. E denunciante ta reclama responsabilidad pa reparacionnan, pasobra el a inverti su propio placa den e cas y su ekiponan. Cu su denuncia publico, Quant kier alerta otro doñonan di cas tocante e importancia di controla ken ta huur nan propiedad y haci acuerdo cla. E ta enfatisa cu pago di huur no ta duna derecho pa causa daño.
