Minister Herbert (Asuntonan Economico y di Clima), e siman venidero, ta haci un bishita di introduccion na e parti Caribense di Reino y lo papia cu gobierno y sector empresarial tocante stimulacion di crecemento economico. Pa realisa crecemento, e islanan ta trahando pa haci miho uzo di e oportunidadnan economico. Cu lantamento di e Plataforma di Crecemento Economico Caribense, Economisch Groeiplatform Carib (EGC), caminda ta conecta empresario y capital miho cu otro, Gabinete ta sostene e ambicion aki.
Durante e bishita di cuater dia (2 – 5 di november), minister Herbert lo bishita Aruba, Corsou y Boneiro y lo tene encuentro cu entre otro e minister presidentenan, gobernadornan, ministernan di economia, empresarionan y representantenan di sector financiero y energetico. Na Aruba e minister ta bishita entre otro e Refineria di Aruba na San Nicolas y ta topa cu sector di turismo. E sector aki ta importante pa crecemento economico y empleo riba e isla. Tambe e ta papia cu personal di ‘Impact Hub’, cu ta sostene empresarionan principiante, cu conocemento y experticio.
Durante e bishita na Corsou e minister lo keda informa tocante desaroyo di nobo di e tereno di e refineria (2Bays) pa energia duradero, industria y economia circular. Ademas tin un tour cu boto den haf di e capital riba programa.
Na Boneiro e minister ta papia cu personal di ‘Prinses Catharina-Amalia Space Innovation Park’, unda e Stacion di Censor di Galileo nobo, ‘Galileo Sensor Station’ (GSS), ta activo desde comienso di e aña aki. E sistema ta sostene e sistema Europeo di nabegacion di satelite Galileo y ta contribui na autonomia strategico di e area Caribense, Hulanda y Europa. Ademas e minister tin un encuentro cu Camara di Comercio y ta presente na celebracion di e di 500 credito di fundacion Qredits, cu ta yuda empresarionan den nan crecemento y desaroyo, cu montantenan te 100.000 dollar.
Minister Herbert: “Crecemento economico ta forma e base pa un comunidad sano y sigur. No awo solamente, sino pa generacionnan despues di nos tambe. Economianan fuerte ta crece pa medio di innovacion y pa e motibo ey por wanta un sla. Esaki ta hopi importante, awo cu nos ta mirando cu mundo ta birando mas dificil pa sa kico ta bai pasa. Mi ta ansioso pa papia tocante esaki durante mi bishita di introduccion.”
