Tin un bario cu na Aruba ta pidiendo ayudo desde basta tempo p’e situacin di dump. Esey ta Santa Marta, mirando cu e situacion aki no ta bon pa nan salud. drs. René Herdé, Minister di Infrastructura ta na altura di e kehonan di habitantenan di Santa Marta y a reuni cu diferente departamento pa se situacion y determina si e actividadnan tin e permitnan necesario.
Minister a confirma di ta na altura di e situacion na Santa Marta y a papia cu algun habitante di e bario. Segun e mandatario, e a ricibi invitacion pa bishita e area y tin intencion di bolbe durante e weekend aki.
Minister Herdé a indica cu e habitantenan a uni y a manda un carta den cual nan ta anuncia cu nan kier inicia un caso contra e compania involucra y gobierno, debi na loke nan ta considera falta di accion pa atende e situacion.
E minister a bisa cu durante e siman cu a pasa el a reuni cu diferente departamento pa analiza e problema y busca un solucion. Ademas, a pidi pa verifica si e actividadnan tin e permitnan necesario.
“Mi ta spera cu ora mi haya e informacion, nos por determina si nan tin permiso pa esey, algo cu mi ta duda, of si ta algo ilegal y con nos ta bay actua”, Minister Herdé a declara.
Segun e minister, e verificacion di e permitnan lo yuda determina cua ta e siguiente pasonan pa atende e situacion na Santa Marta.
