Compania di transporte maritimo Maersk a introduci un aumento den su tarifanan di maneho di container pa Aruba. E gasto di terminal pa un container cu ta yega Aruba a subi di 650 pa 1.000 Dollar, un diferencia di 350 Dollar pa container, ekivalente na un aumento di 53,8%.
E tarifa nobo a drenta na vigor dia 15 di october 2026 y ta conta te cu proximo aviso. E ahuste ta aplica tanto pa containernan di carga seco como pa containernan friu.
Den un aviso publica dia 16 di september, Maersk ta splica cu e revision ta consecuencia di aumento den gastonan relaciona cu waf y operacion. Segun e compania, esaki ta haci necesario adapta su structura di tarifanan pa cubri e gastonan mas halto di maneho na terminal.
Importacion ta e aumento mas grandi
Segun e comparacion di tarifanan facilita, e Destination Handling Charge (DHC), esta e gasto di maneho na terminal di destino, a pasa di 650 Dollar den e tarifa cu a drenta na vigor dia 15 di october 2025, pa 1.000 Dollar un aña despues.
Pa containernan cu ta sali for di Aruba, e Origin Handling Charge (OHC), esta e gasto di maneho na terminal di origen, a subi di 350 pa 360 Dollar. Esaki ta un aumento di 10 Dollar, of aproximadamente 2,9%.
E tarifanan nobo ta conta pa container. E aviso dirigi na clientenan ta indica cu nan ta aplica pa tur container, sin diferencia di tamaño den e lista publica.
Posibel presion adicional riba prijsnan
E aumento di 350 Dollar pa container cu destino Aruba ta representa un gasto adicional pa importadonan cu ta transporta mercancia cu Maersk. Dependiendo di e cantidad y tipo di producto den cada container y di con e empresanan absorbe of pasa e gasto pa nan clientenan, esaki por pone presion adicional riba prijsnan di benta.
Sinembargo, e aumento di 53,8% ta referi specificamente na e gasto di terminal na destino. Esaki no ta nifica cu e prijs total di transporte maritimo, ni e prijs di productonan den tienda, ta subi cu e mesun porcentahe.
E aviso di Maersk no ta cuantifica e impacto riba prijsnan pa consumido, ni ta detaya cuanto cada componente di e gastonan portuario y operacional ta aumenta.
Aplicacion ta depende di condicionnan di reserva
Maersk ta indica cu e tarifa aplicabel ta depende di e fecha cu ta conta pa calculacion di prijs, conoci como Price Calculation Date (PCD) y di e tipo di reserva. P’esey, e fecha cu un container yega Aruba no ta necesariamente e unico factor cu ta determina cua tarifa ta conta.
E compania ta recomenda clientenan cu tin pregunta riba e ahuste pa tuma contacto cu nan representante local.
