Durante tratamento di Presupuesto Supletorio cu a tuma luga dialuna den Parlamento di Aruba, Prome Minister mr. Evelyn Wever-Croes a contesta y elabora riba diferente topico a base di preguntanan cu a bin dilanti den Parlamento. Entre otro e situacion actual di Parkietenbos.
Gabinete Wever-Croes ta para pa un solucion pa e problema di Parkietenbos pasobra e habitantenan merece miho. Serlimar ta trahando pa cuminsa baha e cero y haci’e mas accesibel pa por haci e trabounan eyriba y pa evita cu e candela ta cende y pag’e si e cende. Esaki segun Prome Minister, ta cosnan cosmetico pero cu mester y ta hayando atencion urgente pasobra no ta
husto cu e bario ta haña e tipo di problema nan aki.
Serlimar a informa Prome Minister cu nan a entrega un presupuesto di 1.5 miyon na e ex-minister, pero cu e ex-minister no a haci nada cu esaki. “Si ta 1.5 miyon ta tuma pa no tin candela eyriba, nos tur ta dispuesto pa di un caminda bin cu e placa aki. Por lo menos e ora por evita e candela cu ta molestia e bario”, Prome Minister a enfatisa.
Prome Minister tin apenas algun siman cu a tuma over e encargo di e cartera aki. Por lo tanto no por duna mucho informacion ainda pa loke ta trata e termino mediano of largo di solucion pa e dump na Parkietenbos. Den cuardo di coalicion Gobierno ta deliberando riba e particion di e departamento y institutonan y hunto lo fiha un solucion termino largo pa e problema di Parkietenbos.
