“Mi ke pidi kada un YDK pa djòin mi i yama danki nan nos hermana isla Aruba”, asina prome minister di Corsou, Eugene Rhuggenaath, a skirbi un rato pasa riba su pagina di Facebook. E ta referi na e hecho cu Dr. Horacio E. Oduber Hospital a saca un man y mustra solidario cu Curacao Medical Center pa tuma pashentnan contagia cu Covid. E hospital di Corsou ta completamente yen!
“Aruba a mira nos situacion y inmediatamente a drenta den un maneho di crisis. Danki na esaki nan a crea luga pa nos na nan Dr. Horacio E. Oduber Hospital. Door di haci adaptacion den nan programa di cuido, nan por ofrece nos 30 cama riba un afdeling regular y 6 cama riba ICU”, di acuerdo cu e minister presidente saliente di nos isla ruman.
A traslada algun pashent pa Aruba caba y ta ricibiendo e trato medico cu nan mester.
“Aruba no a stop eynan. Nan tambe a pone restriccion na orarionan di tienda y otro actividadnan pa evita cu nan tambe lo tin hopi persona infecta cu lo mester di cuido intensivo. Loke Aruba ta haci pa nos, mi casi no tin palabra p’e. E ta un acto asina grandi y e ta haci un impacto inmenso riba nos comunidad”, asina Eugene Rhuggenaath a subraya.
“Esaki ta mustra atrobe con ora traha #huntu y cu meta en comun, con leu nos por yega y combati e enfermedad aki. No one stays behind! Un danki na Minister Presidente demisionario Evelyn Wever-Croes, na comerciantenan di Aruba cu a scucha e yamada di Minister y tambe ta duna nan aporte, na pueblo di Aruba cu tambe ta na cas mas trempan y asina duna di nan parti y sin lubida Dr. Horacio E. Oduber Hospital cu a adapta nan programa di cuido pa asina pone nan mes na servicio di nos Yiu di Korsounan cu mester e cuido medico. Masha danki!”
