Weekend tras di lomba Cuerpo Policial di Corsou (KPC) atrobe tabata den luz negativo, despues cu un “WhatsApp” a bay rond caminda ta “denuncia” cu vocero policial, I. Zwerver, lo ta den situacion no masha bunita cu algun dama den cuerpo policial y tambe di un centralista hende muhe cu ta duna servicio di “escort”.
A base di e “app” aki, por a compronde cu a laga haci investigacion pa sa kico ta berdad den e dos casonan aki. Esaki a conduci na prohibi entrada na tanto e trahado den central di polis, como e vocero policial, na tur facilidad di Cuerpo Policial.
Manera nos a bisa mas ariba henter e caso aki a cuminsa cu un “WhatsApp” cu a bay rond di un ex-polis/ex-sindicalista, cu ta papia di a tende cu e vocero policial su man ta los y tin varios dama den cuerpo policial ta atende cu ne. E ex polis ey a bisa di a papia cu e hefe di mando, esta Ellis di e situacion aki.
Na mes momento e ta papia di un trahado den central di polis, cu tin un compania di “escort” of e trahado aki mes ta traha como “escort”. For di na momento cu esaki a bin dilanti, a sali lista di prijs di e trahado aki su ‘escort”.
Bastante cos for di sla e ex agente policial a papia di dje den e app cu lo ta tumando luga den cuerpo policial, y cu lo tin tapamento pisa pa otro pa tal situacionnan.
Esakinan a conduci cu Team di Maneho di Cuerpo Policial dia 11 di september 2022, anochi a duna dos miembro di Cuerpo Policial un banda, prohibi nan entrada na oficinanan di polis pa asina investiga kico tin di berdad.
E medida di ordo aki ta pa investiga acusacionnan cu a sali den medionan social y cu ta tilda e miembronan di comportacion indesea den esfera di trabou. Mientras cu e investigacion ta continua, e miembro aki no por eherce su funcion den Cuerpo Policial.
En bista cu te ainda ta trata di un medida disciplinario y e caso aki ta den investigacion, no por duna mas informacion tocante di esaki.
