Departamento di Agricultura, Cria y Pesca (DLVV) Santa Rosa tabata tin honor di ricibi bishita di minister Plenipotenciario di Washington sra. Joselin Croes acompaña pa su consehera. Su bishita tabata relaciona cu algun posibel proyectonan cu por wordo realisa internacionalmente cu Universidadnan Mericano conhuntamente cu Santa Rosa.
E kier a mira kico por ta otro posibilidad pa logra haya fondonan internacional pa por realisa proyectonan piloto hunto cu Santa Rosa. Estudionan riba cierto tereno cu Santa Rosa ta desea di haci y mira si esakinan tambe por ta realisabel cu institucion y/of Universidadnan internacional cu stagiaire cu por bin realisa esakinan hunto cu Santa Rosa via un programa special.
Directora sra. Nathalie Maduro a duna un amplio splicacion na e minister riba e proyectonan cu tin pendiente y con esakinan por ta realisabel, rekeriendo su sosten den dado caso.
Un otro punto treci dilanti tabata e dificultadnan cu Departamento di Agricultura, Cria y Pesca Santa Rosa ta pasando aden riba e tema di Awa y Terenonan cu ta masha limita pa Agricultura y Cria na Aruba.
Logronan di Santa Rosa tambe a wordo treci dilanti pa e minister cu a keda masha contento di tende esakinan. Minister Plenipotenciario sra. Joycelin Croes a elogia masha hopi con esakinan a tuma luga y con den añanan transcuri Santa Rosa a haya un acogida positivo den pueblo cu ta hopi di admira, segun e minister.
Minister Plenipotenciario sra Joselin Croes a reuni cu directora sra. Nathalie Maduro, sr. Di-Angelo Schenker y tambe sr. Humphrey Croes cual reunion a bay den super bon atmosfera cu intercambio di idea y posibilidadnan.
Departamento di Agricultura,Cria y Pesca Santa Rosa ta desea minister Plenipotenciario sra. Joselin Croes hopi exito y ta desea cu por traha den estrecho cooperacion na bienestar di Sector Primario di Aruba.
