E keynote speaker pa e prome Business Summit organisa door di San Nicolas Business Association (SNBA) tabata Gobernador Alfonso Boekhoudt.
Un persona di P’ariba di Brug. Den e discurso cu el a hiba diaranson mainta, e dignatario a papia di e diferente modelonan cu a yega di purba den pasado y kico lo por ta e solucion pa futuro, un mescla di tur pero bayendo den direccion di desaroyo sostenibel.
Den e prome parti Gobernador a papia con el a bin realisa cu San Nicolas ta bayendo atras, na momento cu el a bay haci bishita na un scol bieu di dje cu el a topa su portanan cera riba un dia normal di scol. Informacionnan cu el a busca, a mustra cu e cambionan demografico di San Nicolas ta e causante, no tin suficiente mucha pa yena e klasnan. “E cambio demografico di nos Sunrise City, mi ta kere, a wordo guia pa e falta di actividadnan economico den transcurso di añanan, cu cierre di e refineria como e catalisador di mas grandi. Pero e falta di actividadnan economico den transcurso di aña, ta parcialmente un escogencia,” Gobernador Boekhoudt a splica e audiencia, consistiendo di comerciantenan di San Nicolas y posibel inversionistanan.
Asina tambe el a menciona con na 2016 Tito Bolivar tabatin e vision pa crea un caya di arte pa trece un bida nobo na San Nicolas. Awendia e muralnan aki ta algo cu ta atrae atencion di bishitantenan. Hasta revista Forbes dos siman pasa a invita su lectornan pa ”See The Street Art Capital Of The Caribbean”! Mirando e reaccion aki Gobernador Boekhoudt ta kere cu “e momento a yega awo” pa introduci un modelo economico pa e ciudad.
Tambe e tabatin comentario y conseho riba loke mester bini. Pa bini cu un desaroyo nobo pa P’ariba di Brug (cu ta di Pos Chikito te cu San Nicolas), mester haci e pregunta: Con pa evita di comete e mesun erornan di pasado? Pero prome cu enfoca riba ki era kier bay na crea awo, el a haci algun pregunta riba e enfoke di e ser humano. Pa no lubida e bienestar di e ciudadanonan, nan desaroyo cientifico y tecnologico, sin lubida di pone enfasis riba e eco-sistema unico cu ta duna bida.
E dos sistemanan cu a domina den pasado – esun di demanda y oferta unda cu Gobierno ta duna incentivonan pero no ta envolvi directamente y esun di unda Gobierno mes ta envolvi – no a duna e resultadonan desea na San Nicolas. E economia di mercado liber a conduci na resultadonan unda cu e accionistanan a probecha di e dianan di gloria di e refineria, pero kico el a trece pa e hendenan, a largo plaso, pa e medio ambiente, salud y hasta pa e bida marino y eco-sistema terestre? E otro sistema di placa rapido y deficitnan presupuestario grandi tampoco a logra duna resultado di promesanan haci di un desaroyo, lagando atras un infrastructura mehora den un area bandona, cu tiendanan bashi. “Nos a purba di stimula gastamento y a uza placa cu nos no tin. Pero e “boost” a termino corto a faya den dos forma. Gobierno su debe a subi haltisimo y Aruba su “credit rating” a wordo poni bou di presion. Na di dos luga, sector priva no a reacciona cu inversionnan comercial.”
P’esey e pregunta: Kico awor? El a papia di seis tipo di “capital goods”. Asina el a papia di: 1) Capital humano, pa promove educacion, conocemento y salud di e forsa laboral; 2) capital intelectual, door di pusha e sociedad na un conocemento tecnologico y cientifico mas halto; 3) Capital Natural. Door di protege y restaura e eco-sistema cu ta apoya nos isla chikito; 4) Capital social, crea of duna bida na confiansa den e comunidad cu ta haci inversionnan eficiente posibel. Esakinan cu e otro dos sistemanan ta traha den un forma complementario cu otro.
Pa finalisa su discurso, el a bisa cu inversion tabata un tempo algo hopi simpel. Awendia “nos mester compronde hopi mas miho con pa haya e mescla perfecto di e seis formanan di capital. Si nos kier logra, e era nobo di desaroyo di P”ariba di Brug, mester trece un modelo nobo di Desaroyo Sostenibel. Y nos sa cu nos tin e modelo corecto, si nunca mas nos haya un otro porta di scol cera riba un dia normal di scol.”
