Maestronan di scol tabata tin un reunion cu e mandatario di enseñansa, Rudy Lampe. Minister Lampe a splica cu ta su deber pa ta den contacto cu e maestronan como minister di enseñansa.
El a gradici nan enormemente pa e encuentro di awe. E ora ey nan por a tende for di e boca di minister di enseñansa mes, e informacion corecto. Tin hopi fakenews ta circulando. Hopi informacion incorecto cu tin te awemainta, tin informacionnan incorecto ta circula cu e lo kier kita ambtenaar y/of hende for di trabao. Mester siña na Aruba cu un dado momento den social media y den noticia, practicamente ta fakenews ta domina. Esey no ta un desaroyo positivo, segun e mandatario.
Pesey Minister Lampe ta hopi gradicido pa e oportunidad aki cu cara a cara, e por a duna e maestronan directamente cua ta e informacion corecto y por a bisa nan cu nan no tin nodo di preocupa pasobra no ta bin ningun cambio pa loke ta e posicion huridico di nos maestronan. Ningun hende ta wordo kita for di trabao.
Al contrario, unico cambio cu lo bay bin ta regarda e posicion di e minister. E status di e minister. Na e momentonan aki, e schoolbestuur ta consisti di un hende cu ta e minister, e ta heer en meester, pa loke ta enseñansa publico. E cambio cu ta propone ta pa bin cu un schoolbestuur, unda cu tin mas hende cu ta profesional di enseñansa, cu ta responsabel pa e maneho diario di enseñansa publico.
E posicion di minister so ta cambia. Pa loke ta posicion huridico di tur maestro ta keda igual.
Pakico e cambio
E cambio ey ta bin pa garantisa cu bo por haya un maneho profesional y responsabel pa termino largo pa loke ta enseñansa. Enseñansa bo no por wak e frutonan mesora. Un minister si e so ta schoolbestuur, e ta cambia cada eleccion y un minister ta parti di un partido politico. Partido politico ta voto e ta busca. E ora ey e no ta pa traha un maneho pa long term, pa 10, 20 aña pa loke ta enseñansa. Pesey ta bisa, pa pone e maneho a largo plazo pa loke ta enseñansa den man di profesionalnan di enseñansa y no lage den man di un politico, cu ta depende di voto.
Maestronan no ta convenci
Ta sinti cu maestronan no ta convenci. Minister Lampe a splica cu e ta kere cu loke ta importante ta, cu hecho lo mester convence e maestronan. Na e momentonan aki ta bisa cu ta respeta tur deseo di cualkier maestro. Si e maestronan ta desea cu nan kier keda, cu nan no kier bay over na un stichting, ta respeta esey. Nan por sigui funciona cu nan mesun posicion huridico. Por ta den futuro, ora nan wak con un stichting ta trahando, e obranan por convence nan. Ta compronde cu hende ta desconfia di palabra. Ta bisa cu kier wak’e prome cu wordo convenci. E ora ey ta bisa cu ta respeta esey. Nan por keda sigui cu nan posicion actual. Nan no ta obliga pa bay over den un stichting
