Raad van Advies a duna su conseho riba e presupuesto 2024 di pais Aruba. Loke cu a hala atencion ta cu tin poni un ganashi di 15 miyon cu ta bay ricibi na ganashi for di Utilities N.V. Esaki ta despues di cumpli cu tur nan compromisonan.
E pregunta cu ta surgi e ora ta, di con no ta adapta e tarifa di awa y coriente, pa duna e pueblo un alivio den su cartera, den tur e aumento di prijs di productonan. Mas si mira e fondo cu ta keda atras pa Gobierno.
Sinembargo Minister encarga cu Asunto di Energia , Glenbert Croes, ta bisa cu esaki ta un interpretacion eroneo. El a splica cu e presupuesto traha door di e companianan menciona, ta encera suma di inversion, suma pa nan gastonan di operacion, pa maneho di gobierno (pa reduci tarifa di awa y coriente) y e parti cu ta bay pa Gobierno como accionista principal di e consorcio. E ganashi aki ta parti di e entrada cu Gobierno ta ricibi pa na su turno cumpli cu e diferente compromisonan financiero.
A sigui splica cu no mester lubida e nivel di debe cu pais Aruba tin di prome y durante e pandemia. Ta compromisonan financiero cu mester cumpli cu nan y esakinan ta forma parti di e compromisonan financiero cu e pais tin.
Door di introduccion di e proyecto di Eagle LNG, programa di Hedging, esfuerso pa busca HFO na prijs mas barata, ta spera cu esaki lo keda traduci den e operacion di WEB cu nan por baha tarifa di awa y coriente. “Nos mester haci todo por todo pa alivia costo di bida y diferente componente den costo di bida, manera di awa y coriente, y e ta nos deber.”
Gobierno su compromiso ta pa logra cu ta baha prijs di awa y coriente. E mandatario a expresa e deseo cu por logr’e mañan mes, pero sigur facil e lo no ta. Mirando cu ta traha riba tur e componentenan cu por yuda yega na baha gastonan di e operacion, e ta sinti cu por logra esaki pronto. “Y mi lo aprecia pa en bes di nan mara bloki na nos pia pa no logra, anima e esfuersonan cu Gobierno ta haci na interes di un pais.”
Aunke cu e mandatario ta consciente cu den e mundo politico di Aruba semper lo topa cu hende cu ta di acuerdo cu nan of esunnan cu no ta di acuerdo. E ultimo aki semper lo pone bloki den caminda pa no logra. “Nos determinacion, nos perseverancia, ta duna resulta na final di dia pa nos pueblo y esey mi ta spera di comproba, ora cu yega momento pa anuncia logronan.
E mandatario a priminti di anuncia un logro grandi denter di poco, cu lo trece hopi beneficio pa Aruba y su pueblo.
