Minister di Asunto Economico, Comunicacion y Desaroyo Sostenibel, mr. Geoffrey Wever a bishita Postkantoor un dia prome cu Dia International di Post pa e felicita henter e personal di Post Aruba. El a haya un rondleiding y a sinta cu directiva di Post Aruba N.V. riba nan pasado, nan situacion actual y kico futuro por trece pa nan. E reunion a bay den masha bon ambiente y a sinti cu e compania tin hopi animo y dinamismo pa crece.
“Post Aruba N.V. tambe ta un compania estatal cu tin un potencial grandi, specialmente riba tereno di e-commerce, den combinacion cu e ubicacion geografico di Aruba y Freezone Aruba N.V., e potencial di un cargo hub ta bira ainda mas interesante. Sigur mi lo bay dedica hopi atencion na e potencial aki e proximo añanan”, segun Minister Wever.
Durante siman cu a pasa Minister Mr. Geoffrey Wever a bishita diferente departamento y compania estatal cu ta resorta bou di su ministerio. A bishita Camara di Comercio unda a reuni cu su directiva, a intercambia idea con pa entre otro cuminsa elimina e fenomeno di “red tape”, esta proceduranan administrativo, cu ta hopi burocratico y costoso y cu tin impacto negativo riba hacimento di negoshi na Aruba. E meta principal ta pa bin cu un sistema a base di cual por haci negoshi na un forma mas eficiente y dinamico. “Pronto mi lo elabora mas riba e topico aki y cuminsa comparti e manera con nos lo soluciona e problematica aki”.
Tambe a bishita SER (Sociaal Economishe Raad) unda a cera conoci cu e Algemeen secretaris, Felix Bijlhout y henter e Secretariaat. Aki entre otro a splica Minister kico ta e tarea di SER, esta pa conseha gobierno riba topiconan socio-economico.
A bishita Bureau Intellectueel Eigendom pa haci conoci cu su director, Kelly y nan personal. A haya un splicacion amplio di locual ta nan rol. “A resalta di biaha cu Bureau Intellectueel Eigendom tin un potencial grandi y mester dedica tempo y resources pa optimalisa e bureau aki y hisa entrada pa Pais Aruba”, segun Minister Wever.
“E siman aki tabata un siman sigur fructifero. Mi por a haya un bista amplio di diferente instancianan cu ta resorta bou mi Ministerio,” asina Minister Wever a cuminsa bisa. “Mi ta contento di a haci esaki y di a intercambia ideanan di con por mehora y optimalisa e instancianan aki y hasta tin posibilidad pa hisa entrada di gobierno y desaroya pilarnan economico nobo. Locual tambe a resalta ta cu e directiva y personal di e instancianan aki a demostra den e encuentronan aki cu nan kier traha hunto cu Gobierno pa yuda empuha nos economia y ta motiva y a ofrece tur ayudo na mi.” Minister mr. Geoffrey Wever a termina bisando.
