Despues di a bishita Santa Rosa siman pasa, diasabra ultimo Minister Ursell Arends a pasa cerca Coby Croeze, un cunukero legendario di 90 aña di edad, cu te dia di awe ta planta. E ta planta primordialmente pinda. Minister Arends y su casa a pasa un momento ameno, bou tent na cas di Coby, den compania di famia cu a bin hunto na e ocasion aki pa yuda ranca pinda.
Coby a splica con su tata a pasa su conocimiento di planta p’e y con el a pasa esaki pa su yiunan y su nietonan. Durante e bishita aki, minister Arends a mira di cerca con e proceso ta bay y a haya sa kico Gobierno hunto cu Santa Rosa por haci pa yuda cunukeronan na Aruba. E mandatario a keda impresiona di e union familiar y e pasion pa planta y cosecha.
“Mi ta contento cu Santa Rosa a haci e bishita aki cerca Coby Croeze posibel,” asina Minister Arends a cuminsa ta bisa. “Aki por mira con un Arubiano ta uza un espacio relativamente chikito y saca lo maximo di dje door di planta entre otro pinda. Mi a siña hopi y mi a haya un bista di kico ta e esfuersonan cu cunukero ta haci aki na Aruba. Mi ta agradecido pa e hospitalidad di Coby y henter su famia. E generacion di awe y esun di futuro por siña hopi di Coby y su famia. Den transcurso di e simannan mi dilanti, mi lo bishita mas cunukero pa asina siña mas di kico tur nos propio hendenan ta planta y con nos como Gobierno, por asisti nos cunukeronan.”
Minister Ursell Arends a gradici Santa Rosa pa e iniciativa aki y ta ripiti su compromiso pa traha di cerca cu nan pa hunto por yuda nos cunukeronan. Pasobra na final di dia, Aruba mester di nos tur.
