Cu hopi tristesa Stichting Parkietenbos a tuma nota di e noticia cu recientemente den e bario di Simeon Antonio shete cacho a ataca un mucha di 5 aña coriendo su bicicleta. E mucha a sufri varios herida na su lomba, pia y bil. E situacion aki a bira insoportabel den e bario. Ciudadanonan ta perde nan libertad y ta biba intimida pa e cantidad di cachonan cu ta cana rond riba caya.
Algun dia pasa cachonan a ataca un señora cu ta biba den e casnan di pueblo na Parkietenbos, net na momento cu e tabata bahando di Arubus. Cu su tas e señora tabata purba defende su mes y core cu e cachonan cu tabata atac’e, tabata tres den total. Algun siman pasa cachonan hambriento a ataca un otro señora saliendo di un minimarket. E cachonan ta manera insisti cu nan tin derecho di blaf y morde. E dia ey ta chauffeur di un truck di un compania di concret a yuda e pober señora.
Ya den pasado a pidi City Inspector atencion pa e problema aki den e bario, pero te cu awe no a haci nada. Tin ciudadanonan ta reclama tambe cu den oranan di anochi laat e cachonan riba caya ta bolter barinan di sushi rondiando cuminda.
Stichting Parkietenbos ta urgi e departamentonan concerni pa actua; cachonan mester ta den cura, mester pone e doñonan di cacho para responsabel y mester duna multa na esunnan cu no ta cumpli.
Lo mester piki cachonan sin doño y hiba nan na un centro pa busca un otro doño pa nan. Ta ora pa awo si ehecuta e ley di cacho, pueblo ta paga belasting y merece di por biba trankil, di por cana den bario bay cumpra cuminda, bishita un otro bisiña, baha di un bus sin tin temor of muchanan mester por core nan bicicleta sin intimidacion.
