Aña pasa e hoben Cassidy Murray a fayece pa motibo di un accidente acuatico. E mayornan, Linda y David Cassidy, ta poniendo presion pa tin mas norma di siguridad den lama. Nan ta haci esey cu e speransa pa proteha otro famia pa no pasa den mesun dolor cu nan ta pasando aden.
E representante Mericano Stephen Lynch a indica cu si Aruba no cumpli cu e exigencianan di e famia, e ta dispuesto di golpia Aruba unda mas ta haci dolor, cual ta e economia. E lo haci esey door di pidi Departamento di Estado pa emiti un advertencia di biahe. Mientras cu Linda Murray a expresa di no kier transmiti e mensahe di no bay Aruba, pero kier pa Aruba siña di esey y mehora e medidanan di siguridad p’e deportenan acuatico.
Durante conferencia di prensa Minister di Turismo, Dangui Oduber, a indica cu na momento cu e accidente a tuma luga, a institui un taskforce di diferente departamento di gobierno, ATA tambe ta forma parti di esaki. A bin dilanti cantidad di recomendacion y accion di cual gobierno mester tuma.
Gobierno ta tumando e accionnan basa riba e recomendacionnan cu e taskforce a trece dilanti.
