Despues di e sucedido lamentabel di diabierna ultimo, unda cu un bus di nos compania estatal di transporte, Arubus NV, a pega candela riba caminda, un rumor a cuminsa circula cu e chauffeurnan lo kier a welga y pone trabou abou dialuna.
Inmediatamente Minister di Transporte, sr. Chris Romero, a mobilisa pa asina logra sinta na mesa cu e trahadornan cu ta representa pa sindicato STA.
Minister Romero semper a boga pa dialogo, como cu e ta kere fervientemente cu e ta algo necesario y importante den cualkier situacion cu presenta. Aki ta unda a logra un reunion entre e Hunta Directiva di Arubus NV, cu Minister a institui, y sindicato STA. Di e manera aki Minister Chris Romero a notifica nos comunidad cu dicho protesta a keda cancela y asina tur actividad di transporte publico a continua cu total normalidad.
Mas cu claro, Minister Chris Romero a instrui esnan encarga pa tuma medidanan di siguridad mas estricto pa por garantisa trankilidad na tur usuario di Arubus su servicionan. Inmediatamente a saca for di circulacion e otro busnan di e mesun model y aña di fabricacion, cu e intencion pa pasa den un inspeccion riguroso pa asina tuma un desicion di kico lo haci cu nan, cual tambe lo bay haci cu e otro busnan cu tin den circulacion. Aworaki ta wardando e rapportnan tanto di Brandweer y di BFTO keda cla pa asina sa exactamente kico tabata e causa di e incendio.
Minister Romero semper a kere den dialogo como e vehiculo principal pa soluciona mal comprondemento y problemanan cu semper por surgi den cualkier aspecto di bida. Na e momentonan aki tin un bon palabracion haci entre e Hunta Directiva y sindicato STA encuanto e accionnan cu ta tumando luga caba y lo mester tuma luga ainda den Arubus NV. Asina aki, den conhunto y cu coperacion di tur partido concerni, nos lo logra soluciona tur e retonan cu Gabinete Wever-Croes a haya ora di asumi e riendanan di nos pais.
