Pa algun tempu kaba Frakshon di PAR ta tumando nota insistentemente den medionan di komunikashon di diferente inkietut rondó di KPC sea den e ámbito di maneho of esun finansiero of un kombinashon di nan dos.
E skarsedat di fondonan ku ta afektá e kadena hudisial tambe ta kreando e impreshon den nos komunidat ku esaki ta influensiando funshonamentu i efektividat di miembronan di nos kuerpo polisial.
Esaki ta un desaroyo negativo ku mester atendé rápidamente kuné.
Skarsedat di sèn por tin influensia sigur riba komportashon i ehekushon di e trabou di miembronan di kuerpo polisial pero di otro banda e situashon ta rekerí un maneho ku mester por minimalisá e impakto, intrankilidat i insertidumbre tantu interno i eksterno ku e meta pa garantisá ku polisnan ta keda “on the ball” den nan funshonamentu.
Den nos afan pa haña mas klaridat i alabes risibí e informashon korekto riba esaki nos ta hasi uso di artikulo 96 di reglamentu di orden di Parlamento pa hasi minister e siguiente preguntanan:
- Minister a yega di hasi un ‘nulmeting’ den tur e departamentonan di KPC esaki pa tin un bista kla riba e totalidat di e retonan?
- Minister por indiká na Parlamento si tin retonan aktualmente den KPC di tal grado ku esaki ta stroba funshonamentu optimal di e kuerpo aki?
- Kiko ta e kambionan i o adaptashonnan ku mester implementá den KPC pa motibu di falta di e fondonan nesesario?
- E situashon finansiero e ta di tal índole ku mester inkorporá diferente departamento i o servisio huntu?
- Kon minister ta evaluando i atendiendo ku e konsekuensianan di e kambionan ku a keda of ta bai keda implementá?
- Minister por informá Parlamento ku si e retonan finansiero ta afektá tur departamento di KPC?
- Minister por indiká na Parlamento kua ròl sindikatonan tin den e totalidat aki?
- Minister tin un maneho pa informá miembronan di KPC riba e diferente trayektonan ku mester keda implementá?
Nos tur ta na altura di e situashon delikado finansiero ku Kòrsou ta konfrontando pero esaki no por bai a kosto di e sentido di seguridat den nos komunidat.
E situashon ta rekerí di partisipashon i komprenshon di tur aktor pa yega na palabrashonnan konkreto i asina sigui traha konhuntamente pa un Kòrsou mas safe i sigur.
